နတ်ရေကန်တိုက်ပွဲတွင် စစ်တပ်၏ ပါရာမော်တာကို AA ပစ်ချ

‎‎ဧရာဝတီတိုင်းမ်
‎အောက်တိုဘာ ၃၀ ရက်

‎မကွေးတိုင်း၊ ငဖဲမြို့နယ်၊ ပဒါန်းတပ်နယ်ရှိ နတ်ရေကန်အနီးတိုက်ပွဲကို လေကြောင်းပစ်ကူလာသည့် စစ်တပ်၏ ပါရာမော်တာ တစ်စီးအား အာရက္ခတပ်တော် AAက ပစ်ချလိုက်သည်ဟု သိရသည်။

‎ယနေ့ အောက်တိုဘာ ၃၀ရက် နံနက်ပိုင်းတွင် ဆုံကုန်း အမြောက်စစ်ဆင်ရေးကွပ်ကဲမှု ဌာနချုပ် မစခ ၉၀၅ မှတက်လာပြီး နတ်ရေကန်လမ်းကြောင်းဘက်တက်သည့် နေရာတဝိုက်ကို ဗုံးပတ်ကြဲနေသည့် ပါရာမော်တာကို AAက ပစ်ချခဲ့ခြင်းဖြစ်သည်။

‎”ပါရာမော်တာကိုပစ်ချလိုက်တာ မောင်းသူတစ်ဦးပါပြုတ်ကျသွားတယ်လို့ သတင်းတွေကြားနေပါတယ်။ လေကြောင်းက ဗုဒ္ဓဟူး ညပိုင်းကတည်းက အပြင်းအထန် တိုက်ခိုက်နေတာ” ဟု မကွေးသတင်းရင်းမြစ်က ဧရာဝတီတိုင်းမ်ကိုပြောသည်။

‎ပြီးခဲ့သည့် အောက်တိုဘာ ၂၈ရက်နေ့က ပဇီနှင့် ဂုတ်ကြီးအကြား တောင်ကုန်းများမှနေ၍ နတ်ရေကန်ဘက်တက်လာသည့် စစ်တပ်၏ အင်အား ၁၅၀ ခန့်ပါ စစ်ကြောင်းကို AAက တိုက်ခိုက်ရာ ၁၀ဦးထက်မနည်းသေဆုံးပြီး ထိခိုက်ဒဏ်ရာ ရသူများလည်း ရှိကြောင်း သိရသည်။

‎ထို့ကြောင့် အောက်တိုဘာ ၂၈ရက် ည ကိုးနာရီမှစ၍ မကွေးလေတပ်မှ တိုက်လေယာဉ်များ နတ်ရေကန်ဘက်တက်ကာ လေကြောင်းတိုက်ခိုက်မှုများပြုလုပ်ခဲ့သည်။ ယနေ့နံနက်ပိုင်းတွင်လည်း ဒရုန်း၊ ပါရာမော်တာများဖြင့်တိုက်ခိုက်စဉ် ပစ်ချခံရခြင်းဖြစ်သည်။

‎ပြီးခဲ့သည့် ရက်ပိုင်းအတွင်းက စစ်တွေနှင့်ငပြီကျွန်းကြား ကုလားတန်မြစ်ဝတွင် တပ်စွဲထားသည့် စစ်တပ်၏ စစ်သင်္ဘော သုံးစီးကို AAက ပစ်ခတ်ဖျက်ဆီးထားနိုင်ခဲ့သည်။

‎ယခု ပါရာမော်တာ ပစ်ချလိုက်သည့် သတင်းနှင့်ပတ်သက်၍ AAပြောခွင့်ရ ဦးခိုင်သုခထံဆက်သွယ်မေးမြန်းထားဆဲဖြစ်သည်။