ဖရူဆိုအနောက်ဘက်ခြမ်းရှိ စစ်ဘေးရှောင်ပြည်သူများထံတွင် စားနပ်ရိက္ခာများ ပြတ်လပ်နေ
ဧရာဝတီတိုင်းမ်
စက်တင်ဘာလ ၂ ရက်
ကရင်နီ(ကယား)ပြည်နယ်၊ ဖရူဆိုမြို့အနောက်ဘက်ခြမ်းမှာ စစ်ဘေးရှောင်ပြည်သူများဆီမှာ ရိက္ခာပြတ်လပ်နေတယ်လို့ စစ်ဘေးရှောင်အရေးကူညီပေးနေသူများထံမှ သိရပါတယ်။
တိုက်ပွဲတွေကြောင့် ဖရူဆိုမြို့အနောက်ဘက်ခြမ်းတွင် စစ်ဘေးရှောင်နေရသည့် ဒေသခံပြည်သူတွေဆီကို အလှူရှင်တွေ လာရောက်မလှူဒါန်းတော့တာကြောင့် စားနပ်ရိက္ခာပြတ်လပ်နေတာ ၂ လ ခန့်ရှိပြီလို့ သိရပါတယ်။
“အလှူရှင်မရှိတော့တာလည်း ၂ လလောက်ရှိပြီ။ စားစရာမရှိတော့လို့ တောထဲမှာရှိတာနဲ့ပဲ ရှာဖွေစားသောက်နေကြရတယ်။ အများစုကလည်း တောရွာတွေမှာ နေတဲ့သူတွေဆိုတော့ အသီးအရွက်တွေပဲ စားကြတာများပါတယ်။ တချို့တွေဆိုလည်း အနားက PDF ၊ KNDF ရဲဘော်တွေဆီကမျှပြီးစားနေရတယ်။ မိုးတွင်းဆိုတော့ သွားရလာရတာလည်း ခက်တယ်။
ကုန်စျေးနှုန်းတွေကလည်း တက် ဖုန်းလိုင်းတွေကလည်း ပြတ်နဲ့ ဘယ်ကိုမှလည်း အကူအညီတောင်းမရဘူး” လို့ စစ်ဘေးရှောင်အရေးကူညီပေးနေသူတစ်ဦးက ဧရာဝတီတိုင်းမ်ကို ပြောပါတယ်။
လက်ရှိတွင် ကရင်နီပြည်နယ်မှာ ကုန်စျေးနှုန်းများ အဆမတန်မြင့်တက်နေတဲ့အပြင် ဆေးဝါးမလုံလောက်တာကြောင့် စစ်ဘေးရှောင်ပြည်သူများမှာလည်း ရာသီတုပ်ကွေးဖြစ်ပွားနေပြီး အသက်ဆုံးရတဲ့အထိ ဖြစ်ပွားနေတယ်လို့ သိရပါတယ်။
“တုပ်ကွေးအများစုဖြစ်တာတော့ ကလေးတွေများတယ်။ ဆေးဝါးလည်းမလုံလောက်တာကြောင့် အသက်ဆုံးရတဲ့အထိဖြစ်နေတာပါ။ အစားအစာကလည်း ဝဝလင်လင်မစားရ။ ကူးစက်ရောဂါတွေဖြစ်နဲ့ ကလေးတွေလည်း တော်တော်အခြေအနေဆိုးနေတာပါ။ အာဟာရချို့တတာတွေလည်း တွေ့နေရပါတယ်” လို့ စစ်ဘေးရှောင်အရေးကူညီပေးနေတဲ့
ဆရာဝန်တစ်ဦးက ဧရာဝတီတိုင်းမ်ကို ပြောပါတယ်။
တိုက်ပွဲများဖြစ်ပွားနေတဲ့ ဒီးမော့ဆို၊ ဖရူဆို၊ ရှားတောနှင့် ဖယ်ခုံမြို့နယ်များသို့ ဆေးဝါးသယ်ယူပို့ဆောင်ခွင့်ပိတ်ပင်ထားတာကြောင့် ယင်းဒေသများရှိ စစ်ဘေးရှောင်ပြည်သူများ ဆေးဝါးကုသရန် အခက်အခဲများရှိလာပြီး ပြီးခဲ့တဲ့ ဇူလိုင်လ တလတည်းမှာပင် အချိန်မှီဆေးကုသခွင့်မရသဖြင့် သေဆုံးခဲ့သူ ၄ ဦးအထိရှိနေတယ်လို့ ဖယ်ခုံမြို့ခံတစ်ဦးကဆိုပါတယ်။
လက်ရှိမှာ ဆေးဝါးရှားပါးခြင်း၊ ဆေးဝါးကုသမှုခံယူနိူင်မည့် ဆေးရုံနှင့် ဆေးပေးခန်းတို့နှင့် အလှမ်းဝေးလွန်းခြင်း၊ ရာသီဥတုအေးပြီး မိုးလုံလေလုံသော နေရာထိုင်ခင်းများ မရှိခြင်း၊ သင့်တင့်မျှတသော အစားအစာအဟာရ မရရှိခြင်း၊ ကျန်းမာရေးဝန်ဆောင်မှု မရှိသလောက်ရှားပါးခြင်းတို့ကြောင့် တစ်လအတွင်း စစ်ဘေးရှောင်ပြည်သူ ၄ဦးအထိ သေဆုံးခဲ့ရတာလို့ CDM
ဆရာဝန်တစ်ဦးက သုံးသပ်ထားပါတယ်။
ဓာတ်ပုံ – ပေးပို့
#ဖရူဆို #စစ်ဘေးရှောင် #စားနပ်ရိက္ခာ #ပြတ်လပ်
#Ayeyarwaddy_Times
