ဧရာဝတီတိုင်းမ်
အောက်တိုဘာ ၂၅ရက်
ရခိုင်ပြည်နယ်၊ အမ်းမြို့နယ်၊ တပ်တောင်မြို့တွင် စိတ်ကျန်းမာရေးမကောင်းဘဲ စကားမပြောတတ်သည့် အမျိုးသမီးတစ်ဦးကို မုဒိမ်းကျင့်ခဲ့သည့် တရားခံအား တရားဥပဒေစိုးမိုးရေးနှင့် ပြည်သူ့လုံခြုံရေးဌာန (ဒီလပ်) က အောက်တိုဘာ ၁၂ ရက်တွင် ဖမ်းဆီးထိန်း သိမ်းလိုက်ကြောင်း အာရက္ခ မှုခင်းနှင့် ဆက်စပ်သတင်းများ ထုတ်ပြန်ရေးအဖွဲ့မှ သတင်းထုတ်ပြန်သည်။
ပြီးခဲ့သည့် အောက်တိုဘာ ၁၁ ရက် မွန်းလွဲ ၁၂ နာရီခန့်တွင် တပ်တောင်မြို့၊ အမှတ် (၂) ရပ်ကွက်နေ အသက် ၃၁ နှစ်အရွယ် စိတ်ကျန်းမာရေးမကောင်းသည့် အမျိုး သမီးအား မိခင်ဖြစ်သူက ထမင်းစားရန် လာရောက်ခေါ်ဆောင်စဉ် ခြံတစ်ခုအတွင်းသို့ ဝင်ရောက်သွားသည်ကို မြင်တွေ့ခဲ့ရသည်။
ထို့နောက် မိခင်ဖြစ်သူမှ နောက်မှလိုက်သွားကြည့်ရှုရာ ခြံစည်းရိုးဘေး၌ တပ်တောင်မြို့၊ အမှတ် (၃) ရပ်ကွက်နေ အောင်သန်းရွှေ ၄၄ နှစ် ဆိုသူက သမီးဖြစ်သူအား အဓမ္မပြုကျင့်နေသည်ကို တွေ့ရှိခဲ့ရသဖြင့် သတ်ပုတ်တားဆီးခဲ့ရာ တရားခံမှာ ထွက်ပြေးလွတ်မြောက်သွားခဲ့သည်။
အဆိုပါ ဖြစ်စဉ်နှင့် ပတ်သက်၍ မိခင်ဖြစ်သူက အောက် တိုဘာ ၁၂ ရက် မွန်းလွဲ ၁၂ နာရီခွဲတွင် နယ်မြေဒီလပ်စခန်းသို့ လာရောက်တိုင်တန်းခဲ့သဖြင့် ဒီလပ်စခန်းမှ (ပ) ၂၃/၂၀၂၆၊ ရာဇသတ်ကြီးပုဒ်မ ၃၇၆ ဖြင့် အမှုဖွင့်လှစ်ကာ စုံစမ်းစစ်ဆေးမှုများ စတင်ဆောင်ရွက်ခဲ့သည်။
အမှုဖွင့်ပြီးနောက် သက်သေများနှင့် အခင်းဖြစ်ပွားရာနေရာတို့ကို စစ်ဆေးခြင်း၊ မှတ်တမ်းယူခြင်းများ ဆောင် ရွက်ခဲ့ပြီးနောက် ထွက်ပြေးလွတ်မြောက်နေသည့်တရားခံ အောင်သန်းရွှေအား တပ်တောင်မြို့တစ်ဖက်ကမ်းရှိ ကျွဲကူးတောင်ရွာ ကူးတို့ဆိပ်တွင် ရောက်ရှိနေကြောင်း သတင်းရရှိသဖြင့် အောက်တိုဘာ ၁၂ ရက် မွန်းလွဲ ၁ နာရီခန့်တွင် သွားရောက်ဖမ်းဆီးခဲ့ခြင်း ဖြစ် သည်။
ဖမ်းဆီးရမိသူ အောင်သန်းရွှေအား စစ်ဆေးရာတွင် ၎င်းအနေဖြင့် အဆိုပါ စိတ်ကျန်းမာရေးမကောင်းသည့် အမျိုးသမီးကို အဓမ္မပြုကျင့်ခဲ့ကြောင်း ဝန်ခံထွက်ဆိုထားသည်။ လက်ရှိတွင် နစ်နာသူနှင့် တရားခံတို့အား ဆေးစစ်ခြင်း၊ သက်သေခံ အဝတ်အစားများ သိမ်း ဆည်းခြင်း စသည့် လုပ်ငန်းစဉ်များ ဆောင်ရွက်လျက်ရှိပြီး ဥပဒေအကြံပြုချက်နှင့်အတိုင်း တရားစွဲဆို တင်ပို့သွားမည်ဖြစ်ကြောင်း သိရသည်။
ဓာတ်ပုံ-ဒီလပ်
