ဧရာဝတီတိုင်းမ်
အောက်တိုဘာ ၂၃ ရက်
စစ်ကိုင်းတိုင်း၊ ဟုမ္မလင်းမြို့နယ်၊ တောင်ဦးကျေးရွာရှိ စစ်တပ်နှင့် ရှမ်းနီအမျိုးသားများတပ်မတော် (SNA) တို့ ပူးပေါင်းတပ်စွဲထားသည့် တပ်စခန်းတစ်ခုကို ကချင်လွတ်လပ်ရေးတပ်မတော် (KIA) နှင့် ပြည်သူ့ကာကွယ်ရေးတပ်ဖွဲ့ (PDF) ပူးပေါင်းတပ်များက သိမ်းပိုက်လိုက်ကြောင်း သိရသည်။
စစ်တပ်နှင့် SNA တို့ ပူးပေါင်းခြေကုပ်ယူထားသည့် စခန်းကြီးတစ်ခုဖြစ်သည့် SNA တပ်မဟာ ၉၇၂ လက်အောက်ခံ၊ တပ်ရင်း (၄) ဌာနချုပ်ကို ယမန်နေ့ အောက်တိုဘာ ၂၂ရက် ညပိုင်းတွင် သိမ်းပိုက်ခဲ့ခြင်း ဖြစ်သည်။တိုက်ပွဲအတွင်း စစ်တပ်ဘက်မှ ၁၀ ဦးထက်မနည်း သေဆုံးခဲ့ပြီး လက်နက်၊ ခဲယမ်းနှင့် အခြားဆက်စပ်ပစ္စည်း အမြောက်အမြားကိုပါ သိမ်းဆည်းရမိခဲ့ကြောင်း သိရသည်။
”အရှေ့ရက်တွေက တာမယ်ပုတ်မှာရှိတဲ့ စခန်းနှစ်ခုကိုသိမ်းတယ်။ အခုတောင်ဦးက စခန်းကိုထပ်သိမ်းတယ် ခဲယမ်း၊ လက်နက် အများကြီးရလိုက်တယ်လို့ သိရပါတယ်” ဟု ကချင်သတင်းရင်းမြစ်က ဧရာဝတီတိုင်းမ်ကို ပြောသည်။
အဆိုပါစခန်းကို မသိမ်းပိုက်မီ ပြီးခဲ့သည့် အောက်တိုဘာ ၁၈ရက်ကလည်း တောင်ဦးကျေးရွာဘက်သို့ သွားသည့် လမ်းတလျှောက်ရှိ စစ်တပ်၏ ကာကင်းစခန်းငယ်များကို KIA နှင့် ပူးပေါင်းတပ်များက ဆက်တိုက် တိုက်ခိုက်သိမ်းပိုက်ခဲ့သည်။
စခန်းသိမ်းပိုက်ခံရပြီးနောက် စစ်တပ်၏ တိုက်လေယာဉ်များက တောင်ဦးကျေးရွာဝန်းကျင်သို့ လေကြောင်းမှ ဗုံးကြဲတိုက်ခိုက်မှုများ ဆက်တိုက်ပြုလုပ်ခဲ့ကြောင်း သိရသည်။
လက်ရှိအချိန်အထိ တောင်ဦးကျေးရွာအနီးဝန်းကျင်တွင် နှစ်ဖက်တိုက်ပွဲများ ဆက်လက်ပြင်းထန်နေဆဲဖြစ်ပြီး ဟုမ္မလင်းမြို့ပေါ်ကိုမူ စစ်တပ်က ထိန်းချုပ်ထားဆဲဖြစ်ကြောင်း သိရှိရသည်။
ဟုမ္မလင်းရှိ ဆည်ဇင်းနှင့် ဥရုချောင်းရိုးတလျှောက်ကျေးရွာများတွင် တိုက်ပွဲများဖြစ်ပွားနေသည်မှာ ဆယ်ရက်ကျော်ရှိနေခဲ့ပြီး စစ်တပ်က လေကြောင်းတိုက်ခိုက်မှုများလည်း ပြုလုပ်ထားသည်။
