ဧရာဝတီတိုင်းမ်း
အောက်တိုဘာ ၂၂ ရက်
အာဏာသိမ်းစစ်ခေါင်းဆောင်က မတရားဖမ်းဆီးထိန်းသိမ်းထောင်ချထားသည့် လူထုခေါင်းဆောင် ဒေါ်အောင်ဆန်းစုကြည်နှင့် ငါးနှစ်ကျော်ကြာပြီးမှ ပထမဆုံးအကြိမ် စကားပြောခွင့်ရရှိခဲ့ကြောင်း သားဖြစ်သူ ကင်မ်အဲရစ် (ကိုထိန်လင်း) က ထုတ်ဖော်ပြောကြားလိုက်သည်။
“ဒီနေ့ ငါးနှစ်ကျော်ကြာပြီးမှ ကျွန်တော့်မေမေ ဒေါ်အောင်ဆန်းစုကြည်နဲ့ စကားပြောခွင့်ရခဲ့ပါတယ်။ မေမေ့အသံကို ပြန်ကြားရတာ ကျွန်တော့်အတွက် စကားလုံးတွေနဲ့ ဖော်ပြလို့မရလောက်အောင် အဓိပ္ပာယ်ရှိပါတယ်” ဟု ကင်မ်အဲရစ် က သူ၏လူမှုကွန်ရက်မှတစ်ဆင့် ပြောသည်။
ထို့အပြင် အခြေခံလူ့အခွင့်အရေးများကို စစ်အာဏာရှင်များနှင့် အလဲအလှယ်မလုပ်ကြရန် ဗြိတိန်အစိုးရအပါအဝင် နိုင်ငံတကာအစိုးရများကို တောင်းဆိုထားပြီး၊ ဒေါ်အောင်ဆန်းစုကြည်နှင့်တကွ နိုင်ငံရေးအကျဉ်းသား အားလုံးကို ခြွင်းချက်မရှိ ချက်ချင်းလွှတ်ပေးရန် မိသားစုနှင့် ဝန်းရံသူများဘက်က ဆက်လက်တောင်းဆိုထားသည်။
“ မေမေနဲ့ ကျွန်တော့်ဘက်က ရပ်တည်ပြီး အားပေးခဲ့ကြသူအားလုံးကို လှိုက်လှိုက်လှဲလှဲ ကျေးဇူးတင်ပါတယ်။ အားလုံးရဲ့တောင်းဆိုသံတွေကြောင့် ဒီအခွင့်အရေး ရလာခဲ့တာလို့ ကျွန်တော် ယုံကြည်ပါတယ်။ မေမေ လွတ်မြောက်တဲ့အထိ ဆက်လက်တောင်းဆိုပေးကြပါ” ဟု ကင်မ်အဲရစ်က တိုက်တွန်းထားသည်။
တစ်ကြိမ် စကားပြောခွင့်ရရှိရုံဖြင့် မိသားစုနှင့် ပုံမှန်ဆက်သွယ်ခွင့်ရရှိခြင်း သို့မဟုတ် လွတ်မြောက်ခြင်း မဟုတ်ကြောင်းနှင့် အသက် ၈၁ နှစ်ရှိပြီဖြစ်သည့် မိခင်ဖြစ်သူအား စစ်အာဏာရှင်များက ဓားစာခံအဖြစ် အသုံးပြု၍ သံတမန်ရေးအရ အသိအမှတ်ပြုမှု၊ ပိတ်ဆို့အရေးယူမှု လျှော့ပေါ့ရေးတို့အတွက် အပေးအယူ မလုပ်သင့်ကြောင်း ကင်မ်အဲရစ်က ထောက်ပြထားသည်။
