ဧရာဝတီတိုင်းမ်
စက်တင်ဘာ ၂ ရက်
ကချင်ပြည်နယ်၊ ရွှေကူမြို့နယ် ဇင်းဘုံအနီးတွင် ရွေးတုအစိုးရစစ်တပ်၏ တပ်မ (၃၃) ဒုတိယတပ်မမှူး ဦးစီး၍ ရွှေကူမှ ထွက်ခွာလာသည့် စစ်ရေယာဉ်စုကို ကချင်လွတ်လပ်ရေးတပ်မတော် (KIA) က ပိတ်ဆို့တိုက်ခိုက်ခဲ့ရာ စစ်သင်္ဘောများ ထိခိုက်ပျက်စီးမှု အမြောက်အမြားရှိခဲ့ကြောင်း သိရသည်။
ရွှေကူမှ တက်လာသည့် အဆိုပါ စစ်သင်္ဘောစစ်ကြောင်းကို ယနေ့ စက်တင်ဘာ ၂ ရက် နံနက် ၄ နာရီ ၂၀ မိနစ်ခန့်က ဇင်းဘုံအနီးတွင် KIA က တိုက်ခိုက်ခဲ့ခြင်းဖြစ်ပြီး တိုက်ပွဲအတွင်း စစ်သင်္ဘောတစ်စီးမှာ လူအများအပြားနှင့်အတူ ရေထဲသို့ နစ်မြုပ်သွားခဲ့ရပြီး အခြားတစ်စီးမှာလည်း ပျက်စီးသွားခဲ့သည်။
”သင်္ဘောတစ်စီးက လုံးဝနစ်မြုပ်သွားတာမှာ လူတွေလည်း ပါသွားတယ်။ ညကြီးကတည်းက မန္တလေးကနေ ဂျက်ဖိုက်တာတွေ မိနစ်ပိုင်းပဲခြားပြီးတက်လာတာ။ မနက်ကျတော့ ကြဲတော့တာပဲ” ဟု သတင်းရင်းမြစ်က ဧရာဝတီတိုင်းမ်ကို ပြောသည်။
ထို့အပြင် စင်ခန်းအနီးတွင် နောက်ထပ် စစ်သင်္ဘောတစ်စီး ပျက်စီးသွားခဲ့သဖြင့် စုစုပေါင်း စစ်သင်္ဘော သုံး စီး ပျက်စီးခဲ့ရသည်။
KIA ၏ အပြင်းအထန် တိုက်ခိုက်ခံရမှုကြောင့် ကျန်ရှိသည့် စစ်သင်္ဘော နှစ်စီးမှာ အလံဖြူထောင်၍ လက်နက် ချခဲ့ရပြီး စစ်တပ် တပ်ဖွဲ့ဝင် အချို့မှာလည်း ရေထဲသို့ ခုန်ဆင်းထွက်ပြေးခဲ့ကြရကြောင်း သိရသည်။
အထိနာနေသည့် စစ်တပ်သည် ဂျက်ဖိုက်တာ အစီး ၂၀ကျော်သုံး၍ ပစ်ခတ်တိုက်ခိုက်မှုများလုပ်ဆောင်ခဲ့ခြင်းကြောင့် ရွေးတုအစိုးရစစ်တပ် တပ်ဖွဲ့ဝင်များ ရေထဲခုန်ချ၍ ကစဉ့်ကလျား ထွက်ပြေးရသည်များရှိခဲ့ကြောင်း သိရသည်။
ထို့အပြင် ပြီးခဲ့သည့် ဩဂုတ် ၂၉ ရက်နေ့ကလည်း စစ်သင်္ဘောတစ်စီးကို KIA က သိမ်းပိုက်ရရှိခဲ့ပြီး ယမန်နေ့ စက်တင်ဘာ ၁ ရက်နေ့က ဖောက်ခွဲဖျက်ဆီးခဲ့ကြောင်း သိရသည်။
ဩဂုတ် ၃၁ ရက်နေ့ကလည်း ရွှေကူမှ ဗန်းမော်သို့ တက်ရန်ပြင်ဆင်သည့် စစ်ကြောင်းကို ပိတ်ဆို့တိုက်ခိုက်၍ ဇင်းဘုံရှိ စစ်တပ်ခြေကုတ်စခန်းကို သိမ်းပိုက်နိုင်ခဲ့ကာ စစ်တပ်၏ လေကြောင်းပစ်ကူဖြင့် ပြန်လည်စစ်ကြောင်းထိုးမှုကို KIA က ခုခံတိုက်ခိုက်နိုင်ခဲ့သဖြင့် စစ်တပ်မှာ ဆုတ်ခွာသွားခဲ့ရသည်။
