SCEF နှင့် ULA/AA ခေါင်းဆောင်များ တွေ့ဆုံဆွေးနွေး၊ ရေဘေးကူညီရေးနှင့် နိုင်ငံရေးအခင်း အကျင်းများ ပါဝင်

‎ဧရာဝတီတိုင်းမ်
‎ဇူလိုင် ၂၆ရက်
‎

ဖက်ဒရယ်ဒီမိုကရေစီပြည်ထောင်စု ပေါ်ထွန်းရေးဦးဆောင်ကောင်စီ (SCEF) နှင့် ရက္ခိုင်အမျိုး သားအဖွဲ့ချုပ်/အာရက္ခတပ်တော် (ULA/AA) တို့မှ ထိပ်သီးခေါင်းဆောင်များသည် ပြီးခဲ့သည့် ဇူလိုင် ၂၃ ရက်က အွန်လိုင်းမှတစ်ဆင့် တွေ့ဆုံ၍ ရခိုင်ဒေသ ရေဘေးကူညီရေးနှင့် လက်ရှိ နိုင်ငံရေး၊ စစ်ရေး အခင်းအကျင်းများကို ဆွေးနွေးခဲ့ကြသည်။

တွေ့ဆုံပွဲတွင် SCEF အလှည့်ကျသဘာပတိ ခူဦးရယ်လ်နှင့် ULA/AA ဥက္ကဋ္ဌ ဗိုလ်ချုပ်ထွန်းမြတ်နိုင်တို့က အဖွင့်အမှာစကား ပြောကြားခဲ့ကြပြီး SCEF ၏ မဟာဗျူဟာနှင့် မူဝါဒရေးရာ ဦးဆောင်အဖွဲ့ဝင် ပြည်ထောင်စုဝန်ကြီး ချုပ် မန်းဝင်းခိုင်သန်းက နိဂုံးချုပ် စကားပြောကြားခဲ့သည်။

တစ်နာရီကျော်ကြာ ပြုလုပ်ခဲ့သည့် အဆိုပါဆွေးနွေးပွဲ၌ ရခိုင်ပြည်နယ်တွင် ကြုံတွေ့နေရသော ရေဘေးသင့်ပြည်သူများအား လူသားချင်းစာနာမှု အကူအညီပေးအပ်ရေး၊ ပြန်လည်ထူထောင်ရေး ကိစ္စရပ်များအပြင် လက်ရှိ နိုင်ငံရေးအခင်းအကျင်းနှင့် ရှေ့ဆက်ဆောင်ရွက်ရမည့် လုပ်ငန်းစဉ်များကို ရင်းနှီးပွင့်လင်းစွာ တိုင်ပင်ခဲ့ကြသည်။
‎

ထို့အပြင် SCEF ခေါင်းဆောင်များက ကောင်စီဖွဲ့စည်းရခြင်း ရည်ရွယ်ချက်၊ မူဝါဒများနှင့် ရှေ့လုပ်ငန်းစဉ်များကို ရှင်းလင်းပြောကြားခဲ့ကြောင်း သိရသည်။

SCEF သည် အချုပ်အခြာအာဏာကို ပြည်နယ်/ဖက်ဒရယ်ယူနစ်များအတွင်းရှိ ပြည်သူများက ပိုင်ဆိုင်သည်ဟူသော “မျှဝေသုံးစွဲသော အချုပ်အခြာအာဏာ” မူကို ကိုင်စွဲထားသည်။ SCEF တွင် တိုင်းရင်းသားလက်နက်ကိုင် တော်လှန်ရေးအဖွဲ့အစည်းများ (EROs)၊ ဒီမိုကရေစီ တော်လှန်ရေး အင်အားစုများနှင့် ပြည်သူ့ကိုယ်စား လှယ်များ ပါဝင်သည့် “စုပေါင်းခေါင်းဆောင်မှု ” ဖြင့် မူဝါဒတစ်ရပ် တည်း၊ မဟာဗျူဟာတစ်ရပ်တည်းကို အခြေခံကာ ဖော်ဆောင်နေသည့် အဖွဲ့ အစည်းဖြစ်သည်။

လက်ရှိတွင် ULA/AA သည် ရခိုင်ပြည်နယ်အတွင်း မြို့နယ် ၁၄ ခုနှင့် ချင်းပြည်နယ် ပလက်ဝမြို့နယ်တို့ကို ထိန်းချုပ်ထားကာ တရုတ်၊ အိန္ဒိယတို့၏ အခြေခံအဆောက်အအုံ စီမံကိန်းများကိုပါ ကိုင်တွယ် ထားသည့် အင်းအားတောင့်တင်းသော တိုင်းရင်းသားလက်နက်ကိုင် တော်လှန်ရေးအဖွဲ့အစည်း တစ်ခု ဖြစ်သည်။