ဧရာဝတီတိုင်းမ်
ဇွန် ၁၀ရက်
ပေါက်မြို့နယ်ရှိအတွင်းရှိ ရေပြာရဲစခန်းနှင့် ကုက္ကိုစုပျူစောထီးစခန်းတို့ကို မဟာမိတ်ပူးပေါင်းအင်အားစုများက “Operation Su” စစ်ဆင်ရေးအဖြစ် တပြိုင်တည်း ထိုးစစ်ဆင်တိုက်ခိုက်ခဲ့ရာ စခန်းနှစ်ခုလုံးကို အောင်မြင်စွာ အပြီးသတ်သိမ်းပိုက်နိုင်ခဲ့ကြောင်း မကွေးတိုင်းပက ပကဖအပါဝင် တော်လှန်ရေးအင်အားစုများက ယနေ့ ဇွန်လ ၁၀ ရက်နေ့တွင် သတင်းထုတ်ပြန်သည်။
အဆိုပါ “Operation Su” စစ်ဆင်ရေးကို ဇွန်လ ၂ ရက်နေ့ နံနက် ၄နာရီ ၃၀မိနစ် တွင် စတင်ဖော်ဆောင်ခဲ့ခြင်းဖြစ်ပြီး၊ ရွေးတုအစိုးရစစ်တပ်ဘက်မှ လေကြောင်းပစ်ကူ အကြိမ်ရေ ၈၀ ထက်မနည်း အပြင်းအထန် ခုခံပစ်ကူပေးခဲ့သော်လည်း မဟာမိတ်ပူးပေါင်းတပ်ဖွဲ့များ၏ မဆုတ်မနစ် တိုက်ခိုက်မှုကြောင့် ဇွန်လ ၂ ရက် နေ့လယ်ခင်းတွင် ရေပြာရဲစခန်းကိုလည်းကောင်း၊ ဇွန်လ ၄ ရက်နေ့ ညနေပိုင်းတွင် ကုက္ကိုစုပျူစခန်းကိုလည်းကောင်း အသီးသီး အောင်မြင်စွာ သိမ်းပိုက်နိုင်ခဲ့ခြင်း ဖြစ်သည်။
တိုက်ပွဲဖြစ်စဉ်အတွင်း ရွေးတုအစိုးရစစ်တပ်ထံမှ လက်နက်ငယ် ၅၅ လက်၊ လက်နက်ကြီး ၄ လက်၊ အခြား လက်နက်ခဲယမ်းအမြောက်အမြားသိမ်းဆည်းရမိခဲ့သည်။
၎င်းအပြင် ရွေးတုအစိုးရစစ်တပ်ဘက်မှ စစ်သုံ့ပန်း ၅၀ ကျော်ကို ဖမ်းဆီးရမိခဲ့ပြီး၊ စစ်အုပ်စု၏ အတင်းအဓမ္မ လူသားတံတိုင်းအဖြစ် ခိုင်းစေခြင်းခံခဲ့ရသော အမျိုးသမီးနှင့် ကလေးသူငယ်များအပါအဝင် ပြည်သူ ၂၀၀ ကျော်ကိုလည်း ဘေးကင်းစွာ ကယ်တင်နိုင်ခဲ့ကာ လက်ရှိတွင် ကောင်းမွန်စွာ စောင့်ရှောက်ထားရှိကြောင်း သိရသည်။
တိုက်ပွဲအတွင်း အသက်ကို ပဓာနမထားဘဲ တိုက်ပွဲဝင်ခဲ့ကြသည့် တပ်မှူး၊ တပ်သားများနှင့် ကျဆုံးခဲ့ရသော ရဲဘော်များ၊ ပြည်သူများကိုလည်း ဦးညွှတ်အလေးပြုကြောင်း ထုတ်ပြန်ချက်တွင် ထည့်သွင်းဖော်ပြထားသည်။
ယခု “Operation Su” စစ်ဆင်ရေးကို အမျိုးသားညီညွတ်ရေးအစိုးရ (NUG)၊ ကာကွယ်ရေးဝန်ကြီးဌာန (MOD) ပကဖရုံးချုပ်နှင့် မကွေးဖက်ဒရယ်ယူနစ် ကာကွယ်ရေးဝန်ကြီးတို့၏ လမ်းညွှန်ပူးပေါင်းကူညီမှုဖြင့် ဖော်ဆောင်ခဲ့ခြင်းဖြစ်သည်။
အဆိုပါစစ်ဆင်ရေးတွင် မကွေးပြည်သူ့ကာကွယ်ရေးတပ်မတော် ၊ မြိုင် ပကဖ ၊ ပခုက္ကူခရိုင် ပကဖ ၊ KG တပ်ဖွဲ့ ၊ ပေါက်ပကဖတပ်ရင်း ၊ BLY တပ်ဖွဲ့ ၊ YRF တပ်ဖွဲ့ ၊ ပြည်သူ့ကာကွယ်ရေးတပ်မတော် ပခုက္ကူခရိုင်အမှတ် ( ၂ /၆/၇/၁၂ /၁၄/၁၇ / ၁၈ ) တပ်ရင်းများ ၊ မြန်မာနိုင်ငံလုံးဆိုင်ရာကျောင်းသားများ ဒီမိုကရက်တစ်တပ်ဦး( ABSDF) ၊ မကွေးဖက်ဒရယ်ယူနစ်ကာကွယ်ရေးစစ်ကြောင်းများ ၊ ပခုက္ကူပကဖ၊ ကမ္မတပ်ပေါင်းစု+ပြည်သူ့လုံခြုံရေးအင်အားစု(ကမ္မ)၊ PLC တပ်ပေါင်းစု ၊ အညာမြေတပ်ပေါင်းစု ၊ PDO/PDA တပ် ၊ မကွေးတိုင်းလှုပ်ရှားစစ်ကြောင်း အမှတ် ၄ ၊ ပေါက်မြို့နယ် ဆေးတပ်ဖွဲ့ ၊ ပေါက်မြို့နယ် ပအဖ နှင့် တော်လှန်ပြည်သူများက စည်းစည်းလုံးလုံး ပူးပေါင်းဆောင်ရွက်ခဲ့သည်။
လက်ရှိ လတ်တလော စစ်ရေးအခြေအနေများကြောင့် ပခုက္ကူခရိုင်အတွင်းရှိ မိဘပြည်သူများအနေဖြင့် စစ်ရေးအသိ၊ စစ်ရေးသတိအပြည့်ဖြင့် ဂရုတစိုက် နေထိုင်သွားကြရန် မြိုင် ပကဖ က အထူးတိုက်တွန်း နှိုးဆော်ထားသည်။
ဓာတ်ပုံ- မြိုင် ပကဖ
