ဧရာဝတီတိုင်းမ်
ဇွန် ၁၀ရက်
မကွေးတိုင်း၊ ပခုက္ကူမြို့နယ်အတွင်းရှိ မြစ်ခြေရဲစခန်းကို ပြည်သူ့ကာကွယ်ရေးတပ်မတော် (PDF) က ယနေ့ ဇွန် ၁၀ ရက် နံနက်ပိုင်းတွင် အပြီးတိုင် တိုက်ခိုက်သိမ်းပိုက်နိုင်ခဲ့ကြောင်း အမျိုးသားညီညွတ် ရေးအစိုးရ (NUG)၊ ကာကွယ်ရေးဝန်ကြီးဌာန၊ PDF စစ်ရုံးချုပ်က ထုတ်ပြန်သည်။
အဆိုပါ မြစ်ခြေမြို့တွင် ပြီးခဲ့သည့် မေလ ၁၀ ရက်နေ့မှ ဇွန်လ ၂ ရက်နေ့အထိ ရွေးတုအစိုးရ စစ်တပ်က ပြည်သူလူထုပိုင် နေအိမ်အဆောက်အအုံပေါင်း ၁,၀၀၀ ကျော်ကို မီးရှို့ဖျက်ဆီးခဲ့သည့်အပြင် ဒေသခံပြည်သူ ၂၄ ဦးကို ရက်ရက်စက်စက် မီးရှို့သတ်ဖြတ်ကာ စစ်ရာဇဝတ်မှုများ ကျူးလွန်ခဲ့သဖြင့် ယခုကဲ့သို့ လက်တုံ့ပြန်ချေမှုန်းရခြင်းဖြစ်ကြောင်း ထုတ်ပြန်ချက်တွင် ဖော်ပြထားသည်။
PDF တပ်ဖွဲ့ဝင်များသည် ယနေ့ ဇွန် ၁၀ ရက်နေ့ နံနက် ၄ နာရီခန့်က NUG ကာကွယ်ရေးဝန်ကြီးဌာန၊ မကွေးတိုင်းစစ်ဌာနကွပ်ကဲမှုအောက်ရှိ ပခုက္ကူခရိုင်စစ်ဌာန၏ ဦးဆောင်ကွပ်ကဲမှုဖြင့် မြစ်ခြေရဲစခန်းကို စတင်ဝင်ရောက်တိုက်ခိုက်ခဲ့ခြင်းဖြစ်သည်။
စစ်ဆင်ရေးစတင်ပြီး ၁ နာရီအကြာ နံနက် ၅ နာရီတွင် အဆိုပါစခန်းအား အပြီးသတ် ချေမှုန်းသိမ်း ပိုက်နိုင်ခဲ့ကြောင်း PDF စစ်ရုံးချုပ်ထံမှ သိရသည်။
စခန်းသိမ်းတိုက်ပွဲအတွင်း စစ်တပ်ဘက်မှ နှစ် ဦး သေဆုံးခဲ့ပြီး ၁၄ ဦးမှာ လက်နက်ချအညံ့ခံခဲ့သဖြင့် စစ်သုံ့ပန်းအဖြစ် ဖမ်းဆီးထိန်းသိမ်းထားသည်။ ထို့အပြင် ၎င်းတို့ထံမှ G-3 ရိုင်ဖယ် ၁၈ လက်၊ M79 ဗုံးပစ်လောင်ချာ ၁ လက်၊ခြောက်လုံးပြူးသေနတ် ၂ လက်၊ ၆၀ မမ ကွန်မန်ဒိုစိန်ပြောင်း ၁ လက်၊ G-3 ကျည်ဘောက် ၂၇ ဘောက် နှင့် ကျည်တောင့် ၁,၉၀၈ တောင့်၊ လက်လုပ်လေသေနတ် ၁ လက် နှင့် ကျည်ကာဦးထုပ် ၇ လုံးတို့ကို သိမ်းဆည်း ရရှိခဲ့သည်။
လက်ရှိတွင် ဖမ်းဆီးရမိထားသည့် စစ်သုံ့ပန်း ၁၄ ဦးကို နိုင်ငံတကာစစ်ဥပဒေ နှင့်အညီ စနစ်တကျ ထိန်းသိမ်းထားပြီး မြစ်ခြေရှိ အရပ်သားပြည်သူများကို ရက်စက်စွာ မီးရှို့သတ်ဖြတ်၍ စစ်ရာဇ ဝတ်မှုကျူးလွန်ခဲ့သူများကိုမူ စစ်ဘက်ဆိုင်ရာဥပဒေများနှင့်အညီ စိစစ်ဖော်ထုတ်ကာ စစ်တရားရုံးတွင် ထိရောက်စွာ အရေးယူဆောင်ရွက်သွားမည်ဟု ပြတ်ပြတ်သားသား ထုတ်ပြန်ထားသည်။
PDF စစ်ရုံးချုပ်က စစ်တပ်၏ အကြမ်းဖက်နှိပ်စက်မှုကြောင့် သေဆုံးခဲ့ရသည့် မြစ်ခြေဒေသခံ မိဘ ပြည်သူများအတွက် ဝမ်းနည်းကြောင်းနှင့် ကောင်းရာသုဂတိလားပါစေကြောင်း ဆုတောင်း မေတ္တာပို့သ ထားပြီးပြည်သူ လူထုကို ကာကွယ်စောင့်ရှောက်ရန် သမိုင်းပေးတာဝန်အတိုင်း စစ်တပ်ကို အပြီးတိုင် ချေမှုန်းနိုင်ရေး စစ်မျက်နှာအသီးသီးတွင် ဆက်လက်တိုက်ပွဲဝင်သွားမည်ဖြစ်ကြောင်း အသိပေးထား သည်။
ဓာတ်ပုံ-PDF စစ်ရုံးချုပ်
