ဧရာဝတီတိုင်းမ်
ဇွန် ၅ရက်
ဧရာဝတီတိုင်း၊ သာပေါင်းမြို့နယ်၊ စက်ဒေါင့်ကြီးကျေးရွာကို ရွေးတုအစိုးရစစ်တပ်က စစ်လက်နက်နှင့် ခဲယမ်းများ၊ စစ်ကူများပါသည့် စစ်ယာဉ်တန်းများဖြင့် အင်အားဖြည့်လာကြောင်း သိရသည်။
စက်ဒေါင့်ကြီးကျေးရွာကို ယမန်နေ့ ဇွန် ၄ရက်နှင့် ဇွန် ၃ရက်နေ့တို့တွင် စစ်သုံးကားကြီး ၁၅ စီးပါ ယာဉ်တန်းများ ဝင်ရောက်လာကြပြီး လက်နက်၊ ခဲယမ်းများကို သယ်ဆောင်ကာ စစ်ကြောင်းများ တပ်ဖြန့်ထားသည့် ဘုရား ကြီးဘက်ကို ဆက်လက်ထွက်ခွာသွားကြောင်း ဒေသခံသတင်းရင်းမြစ်ထံမှ သိရသည်။
”စက်ဒေါင့်ကြီးကို ခဲယမ်းပါကားနှစ်စီးအပါအဝင် ကား ခြောက်စီးအရင်ရောက်တယ်။ အခုထပ်ပို့ တာနဲ့ဆို ၁၅စီးပေါ့။ ရေကြည်လို့ပြောပြီး ခေါ်လာပုံရတယ်။ ကားပေါ်ပါတဲ့သူတွေက ရေကြည် ဘယ်ဘက်မှာလဲ မေးတာရှိတယ်။ တောဘက်ကိုဆက်တက်မယ့် လက္ခဏာရှိတယ်။ ဓားပါတဲ့ ဘက်တွေပါ ပါလာကြတယ်” ဟု သာပေါင်းဒေသခံ အမျိုးသားတစ်ဦးက ဧရာဝတီတိုင်းမ်ကို ပြောသည်။
သာပေါင်းနှင့် ရေကြည်အစပ်ကို တပ်ဖြန့်နေသည့် စစ်တပ်စစ်ကြောင်းများနှင့် အာရက္ခတပ်တော် (AA) အပါ အဝင် ဒေသကာကွယ် ရေးတပ်များ တိုက်ပွဲပြင်းထန်နေပြီး စခန်းများ လက်လွှတ်ခဲ့ရသည့် ကြောင်လျှာကျေးရွာ ၏ အနောက်ဘက် သော်ကပင်စခန်းတွင် စစ်တပ်က အခြေစိုက်နေကြောင်း သိရသည်။
စစ်တပ်သည် ပုသိမ်မြစ် (ငဝန်မြစ်) အနောက်ဘက်ခြမ်းရှိ ကျေးရွာများတွင် တပ်ဖြန့်နေရာယူထားပြီး မရမ်းချို၊ ညောင်မှော်သောင်တန်း၊ ရွှေရင်မျှော်၊ ဝါးတောကွင်းဘက်ကိုပါ ဒေသခံများ၏ ဆိုင်ကယ်များဖြင့် ကင်းပုန်းဝပ်ခြင်းနှင့် နယ်မြေစစ်ဆေးရေး လုပ်ဆောင်လျက်ရှိသည်။
ရွေးတုအစိုးရစစ်တပ်သည် ထိခိုက်ဒဏ်ရာရရှိထားသည့် ၎င်းတို့၏ တပ်ဖွဲ့ဝင်များကို ဆိုင်ကယ်များ၊ နွားလှည်းများနှင့် သယ်ယူလာပြီး ထိုမှတဆင့် စစ်သုံးကားကြီးများ၊ စစ်ရေယာဉ်များဖြင့် ခွဲ၍ ပုသိမ် အနောက်တောင်တိုင်းစစ်ဌာနချုပ်ကို ခေါ်ဆောင်နေသည်။
ထို့အပြင် ငဝန်မြစ်အတွင်း ရွှေရောင်ချကျေးရွာနှင့် ဘုရားကြီးကြားတွင် ဇက်ရေယာဉ်ပေါ် လက်နက် ကြီးတင်ဆောင်လှည့် လည်နေကာ စစ်ရေယာဉ်များပါရောက်ရှိနေကြောင်း သိရသည်။
ပုံစာ-စစ်အုပ်စုယာဉ်တန်း(ပုံဟောင်း)
