မကွေးတိုင်းတွင် ကာကွယ်ရေးတပ်ဖွဲ့များ စစ်ဆင်ရေးအရှိန်မြှင့်၊ ရွေးတုအစိုးရ စစ်တပ်အရာရှိကြီးအချို့ အပါအဝင် သုံ့ပန်းနှင့် လက်နက်များစွာ ဖမ်းဆီးရမိ

‎ဧရာဝတီတိုင်းမ်
‎ဇွန် ၄ရက်
‎

‎မကွေးတိုင်းစစ်ဌာနအတွင်း ပြည်သူ့ကာကွယ်ရေးတပ်မတော် (PDF) က စနစ်တကျ ကွပ်ကဲ၍ စစ်ဆင်ရေးများ အရှိန်မြှင့်ဖော်ဆောင်လျက်ရှိရာ မေလကုန်မှ ဇွန်လပထမပတ်အထိ သီတင်းပတ် နှစ်ပတ် ခန့်အတွင်း ရွေးတုအစိုးရ စစ်တပ်မှ ဗိုလ်မှူးနှင့် ဗိုလ်ကြီးအဆင့် အရာရှိကြီးများအပါအဝင် သုံ့ပန်း ၁၈ ဦးအထိ ဖမ်းဆီးရမိခဲ့ကြောင်း အမျိုးသားညီညွတ်ရေးအစိုးရ (NUG)၊ ကာကွယ်ရေးဝန်ကြီး ဌာန(MOD)က ယနေ့ ဇွန် ၄ရက် ရက်စွဲဖြင့်ထုတ်ပြန်သည်။
‎

‎သရက်ခရိုင်တွင် ပြီးခဲ့သည့် မေလ နောက်ဆုံးပတ်က နယ်မြေရှင်းလင်းရေး ဆောင်ရွက်စဉ် ခမရ-၅၉၉ မှ ဗိုလ်မှူး အောင်ဖြိုးဝေနှင့် ဗိုလ်ကြီး ပြည့်စုံအောင် တို့ကို လက်နက်ခဲယမ်းများနှင့်အတူ ဖမ်းဆီးရမိခဲ့ပြီး ဇွန်လ ၃ ရက်နေ့ မင်းတုန်းမြို့နယ် တိုက်ပွဲတွင်လည်း စစ်တပ် တပ်ဖွဲ့ဝင် ၁၅ ဦးကို သုံ့ပန်းအဖြစ် ထပ်မံဖမ်းဆီးရမိခဲ့သည်။

ထို့အတူ ပြီးခဲ့သည့် မေ ၂၉ ရက်နေ့ကလည်း နတ်မောက် ဆက်သွယ်ရေးတပ်မှ ဒုတပ်ကြပ် ရန်နိုင်ကို စစ်ဆင် ရေးနယ်မြေတစ်နေရာတွင် ဖမ်းဆီးနိုင်ခဲ့သည်။
‎
‎

မကွေးတိုင်းအတွင်း ချောက်၊ ဆိပ်ဖြူ၊ နတ်မောက်၊ ဂန့်ဂေါနှင့် မင်းတုန်းမြို့နယ်များ၌ ဖြစ်ပွားခဲ့သော တိုက်ပွဲကြီးငယ်ပေါင်း ၄၃ ကြိမ်အတွင်း စစ်တပ်ဘက်မှ ၃၁ ဦး သေဆုံးပြီး ၅၂ ဦး ထိခိုက် ဒဏ်ရာရရှိခဲ့ကြောင်း PDF စစ်ရုံးချုပ်က ဆိုသည်။
‎

‎ထို့ပြင် ပုံတောင်တောင်ကြောမှတစ်ဆင့် ဂန့်ဂေါခရိုင်အတွင်း အင်အား ၁,၀၀၀ ခန့်ဖြင့် စစ်ကြောင်း ထိုးလာသည့် စစ်တပ်ကိုလည်း ကြားဖြတ်တိုက်ခိုက်မှုများ ပြုလုပ်ခဲ့ကြောင်း သိရသည်။
‎
‎ယခုအခါ ဗိုလ်မှူးနှင့် ဗိုလ်ကြီးအဆင့်ရှိသူများပါ မြေပြင်တွင် သုံ့ပန်းအဖြစ် ဖမ်းဆီးခံနေရပြီး စစ်တပ်၏ မြေပြင်စစ်ဆင်ရေးကွပ်ကဲမှုနှင့် ခုခံနိုင်စွမ်း အကြီးအကျယ် ကျဆင်းနေကြောင်း ပြသနေသည်။
‎

ထို့ပြင် ကာကွယ်ရေးပစ္စည်းစက်ရုံ ‎ကပစ-၂၁ သို့ ဦးတည်သည့် ယာဉ်တန်းများကို ချောက်နှင့် ဆိပ်ဖြူမြို့နယ်များတွင် ကြားဖြတ်၊ ခြုံခိုတိုက်ခိုက်ခြင်းနှင့်မိုင်းဆွဲတိုက်ခိုက်နိုင်ခဲ့ခြင်းတို့သည်လည်း PDF တပ်ဖွဲ့များ၏ စစ်ရေးထောက်လှမ်းမှုနှင့် ပြောက်ကျားစစ်ဆင်ရေး နည်းဗျူဟာများ ပိုမိုထိရောက် ထက်မြက်လာကြောင်း ဖော်ပြနေခြင်းဖြစ်သည်။

‎
ရွေးတုအစိုးရ စစ်တပ်သည် ‎ဂန့်ဂေါခရိုင်အတွင်း အင်အား ၁,၀၀၀ ခန့်ဖြင့် အလုံးအရင်း စစ်ကြောင်း ထိုးရန် ကြိုးပမ်းနေသော်လည်း PDF ဘက်က ကြားဖြတ်တိုက်ခိုက်ထိန်းချုပ် ထားနိုင်ခြင်းကြောင့် ယခု မကွေးတိုင်းစစ်မျက်နှာသည် စစ်တပ်အတွက် စစ်အင်အားနှင့် လက်နက်ခဲယမ်း အမြောက်အမြား ပြုန်းတီးရာ နယ်မြေတစ်ခု ဖြစ်လာနေကြောင်း ထုတ်ပြန်ချက်တွင် ဖော်ပြထားသည်။
‎
ဓာတ်ပုံ-MOD