ဧရာဝတီတိုင်းမ်
ဧပြီ ၂၅ ရက်
ယခုရက်ပိုင်းအတွင်း နိုင်ငံတဝန်းနေ့အပူချိန်များမြင့်တက်နေရာတွင် မန္တလေးမြို့၌ အပူချိန် ၄၃ ဒီကရီဆဲလ်စီးယပ်အထိမြင့်တက်နေပြီး အပူဒဏ်ကြောင့်သေဆုံးသူများရှိနေကြောင်းသတင်းရရှိသည်။
၂၀၂၅ ခုနှစ် ဧပြီလ ယခုချိန်တွင် မန္တလေးမြို့အပူချိန်သည် ၄၂ ဒီကရီဆဲလ်စီးယပ်ရှိသဖြင့် တစ်နှစ်ကျော်ကာလအတွင်း အပူချိန် ၁ ဒီကရီဆဲလ်စီးယပ်ရှိလာကာ အပူချိန်မြင့်တက်ခြင်းဖြစ်သည်။
မန္တလေးမြို့တွင်အပူချိန်မြင့်တက်မှုကြောင့် မူးလဲသတိလစ်သူအပူလျှပ်သူများပြားနေပြီး ဆရာဝန်တစ်ဦးသေဆုံးသွားကြောင်း မြို့ခံတစ်ဦးက ပြောကြားသည်။
ပြီးခဲ့သည့်ရက်ပိုင်းတွင် မန္တလေး နန်းရှေ့၊ ၁၉ လမ်းရှိ ဘောလုံးကွင်းရှေ့၌ အမျိုးသားတစ်ဦး ကားအတွင်းရုတ်တရက်သေဆုံးခြင်း၊ အမျိုးသမီးတစ်ဦး မူးလဲသတိလစ်သွားခြင်းကြောင်း လူမှုကယ်ဆယ်ရေးအဖွဲ့များထံမှ သိရသည်။
“မန္တလေးအရမ်းပူတယ်။ အပြင်မထွက်နိုင်ဘူး။ နေ့လယ်ဘက် ကိစ္စရှိလို့ကားနဲ့ အပြင်ထွက်မယ်ဆိုရင်တောင် ကားထဲဦးထုပ်ဆောင်းထားရတယ်။ အပေါ်က အပူက ကားအမိုးရှိ တာတောင်မခံနိုင်ဘူး။ တအားပူတယ်။ အခုပိုပူလာပြီ မနေနိုင်ဘူး “ ဟု မန္တလေးမြို့ခံ ကုမ္ပဏီဝန်ထမ်းအမျိုးသမီးတစ်ဦးက ပြောသည်။
ထိုသို့အပူချိန်မြင့်တက်နေသည့်အပြင် လျှပ်စစ်မီးလုံလောက်စွာမရမှုကြောင့် အပူဒဏ်ခံစားရကာ ကလေးငယ်နှင့် လူကြီးများပိုမိုခံစားရကြောင်း မန္တလေးမြို့ခံ့များထံက သိရသည်။
ပြီးခဲ့သည့်နှစ်ရက်တွင် လျှပ်စစ်မီးလာချိန် နှစ်နာရီတိုးပေးမည်ဆိုသော်လည်း လက်တွေ့တွင် လျှပ်စစ်မီးပိုပြတ်နေကြောင်း မြို့ခံများကဆိုသည်။
လက်ရှိနေ့အပူချိန်မြင့်တက်မှုကြောင့် ချောက်မြို့အပါအဝင် အချို့မြို့ကြီးများတွင် အပူရှောင်စခန်းများဖွင့်လှစ်ထားပြီး ပြည်သူ့ဆေးရုံများတွင် အရေးပေါ်ကျန်းမာရေးစောင့်ရှောက် မှုပေးနိုင်ရန်ပြင်ဆင်ထားကြောင်း ရွေးတုအစိုးရလက်အောက်ရှိ ကျန်းမာရေးဝန်ကြီးဌာနက ထုတ်ပြန်သည်။
စစ်အာဏာရှင်ဦးမင်းအောင်လှိုင်မွေးရပ်ဇာတိမြေဖြစ်သော မင်းဘူမြို့တွင် အပူရှောင်စခန်း ဖွင့်လှစ်နိုင်ရေးအတွက် ကျပ် သိန်း ၃၀၀ ကို ၎င်းက လှူဒါန်းကြောင်း ရွေးတုအစိုးရအာဘော် သတင်းစာများတွင်ဖော်ပြထားသည်။
ထို့ပြင် အပူချိန်မြင့်တက်မှုကြောင့် မိတ်ထွက်ခြင်း၊ ကြွက်တက်ခြင်း၊ အားအင်ကုန်ခမ်းခြင်း နှင့် သတိလစ်ခြင်းတို့ဖြစ်ပေါ်နိုင်ကြောင်း အမျိုးသားညီညွတ်ရေးအစိုးရ ကျန်းမာရေးဝန်ကြီးဌာနက ထုတ်ပြန်ထားသည်။
အပူကြောင့်သတိလစ်ခြင်း ( Heat Stoke) သည် ခန္ဓာကိုယ်အပူချိန်လွန်ကဲ၍ဖြစ်ရခြင်း အသက်အရွယ်၊ ရောဂါအခံနှင့် အခြားအကြောင်းအရင်းတို့ကြောင့်ဖြစ်ရကြောင်း သိရသည်။
ပြီးခဲ့သည့် မတ်လမှစတင်ကာ မကွေးမြို့၊ ချောက်မြို့၊ ရေနံချောင်းမြို့နှင့် နတ်မောက်မြို့တို့တွင် အပူရှောင်စခန်းများဖွင့်လှစ်ပြီး ကျန်ရှိနေသည့်အပူချိန်မြင့်သောဒေသများ တွင် ထပ်မံဖွင့်လှစ်ကြောင်းသိရသည်။
ဓာတ်ပုံ – ဧရာဝတီတိုင်းမ်
