ဧရာဝတီတိုင်းမ်
ဧပြီ ၂၅ ရက်
ရခိုင်ပြည်နယ်၊ သံတွဲမြို့နယ်၊ ငပလီမြို့တွင် စစ်တပ်က Y-12 လေယာဉ် ခြောက် စင်းဖြင့် အုပ်ဖွဲ့ကာ လေကြောင်းမှ အဆက်မပြတ် ဗုံးကြဲတိုက်ခိုက်ခဲ့ရာ ဒေသခံများမှာ ဗုံးခိုကျင်းအတွင်း ပုန်းခိုနေခဲ့ရကြောင်း သိရသည်။
ယမန်နေ့ ဧပြီ ၂၄ရက် နေ့လယ် ၁ နာရီကျော်အချိန်မှစတင်၍ လေယာဉ် ခြောက်စင်းကို အသုံးပြုကာ အကြိမ်ရေများစွာ ဗုံးကြဲတိုက်ခိုက်ခဲ့ခြင်းဖြစ်သည်။
အဆိုပါ တိုက်ခိုက်မှုများနှင့် ပတ်သက်၍ ဒေသခံများနှင့် အဆက်အသွယ်ရှိသူတစ်ဦးက “အဆက်အသွယ်ရသလောက်တော့ ညနေထိ ဗုံးခိုကျင်းထဲကမထွက်ရဲဘူး။ နာရီနဲ့ချီပြီး ကြာအောင် လေယာဉ်တွေ အုပ်ဖွဲ့ပြီးကို ကြဲနေတာ” ဟု ဧရာဝတီတိုင်းမ်ကိုပြောသည်။
ငပလီကို ဧပြီ ၂၃ ရက် က လေကြောင်းတိုက်ခိုက်မှုများ စတင်ခဲ့ခြင်းဖြစ်ပြီး ၂၄ ရက်နေ့တွင် ငပလီလမ်းဆုံနှင့် ဇီးဖြူကုန်းကျေးရွာများအား စစ်တပ်က ပစ်မှတ်ထား တိုက်ခိုက်ခဲ့ပြီးနောက် တိုက်ခိုက်မှု ပြင်းထန်လာခြင်းဖြစ်သည်။
ရခိုင်ဒေသတွင် စစ်တပ်က နယ်မြေဆုံးရှုံးထားရသည့်နေရာများကို ယခုရက်ပိုင်းအတွင်း လေယာဉ်အုပ်လိုက်အသုံးပြု၍ လေကြောင်းမှ အပြင်းအထန် တိုက်ခိုက်လာသည့် ပုံစံမျိုးကို တွေ့မြင်နေရသည်။
ထို့အပြင် ပင်လယ်ပြင်ဘက်တွင်လည်း စစ်တပ်၏ စစ်သင်္ဘောများက ရမ်းဗြဲနှင့် တောင်ကုတ်မြို့နယ်များဘက်သို့ ကမ်းတက်စစ်ဆင်ရေးပုံစံဖြင့် ကမ်းအနီးထိ ကပ်လာမှုများရှိသည်။
ယခင်ကထက် ပိုမိုပြင်းထန်သည့် လေကြောင်းတိုက်ခိုက်မှုများကို အုပ်စုလိုက် အသုံးပြုလာခြင်းသည် ဒေသခံပြည်သူများ၏ ဘေးကင်းလုံခြုံမှုကို ခြိမ်းခြောက်နေပြီး နယ်မြေဆုံးရှုံးထားသည့် ဒေသများကို ပြန်လည်ထိန်းချုပ်ရန်နှင့် ဖျက်ဆီးရန်အတွက် လေကြောင်းစွမ်းအားကို အစွမ်းကုန်အသုံးပြုလာခြင်းဖြစ်သည်။
