ဧရာဝတီတိုင်းမ်
ဧပြီ ၂၁ ရက်
မကွေးတိုင်း၊ ငဖဲမြို့နယ်၊ ပဒါန်းတပ်နယ်ရှိ နတ်ရေကန်ဗျူဟာစခန်းပတ်ဝန်းကျင်တွင် စစ်အုပ်စုတပ်များ တပ်ဖြန့်လှုပ်ရှားမှုများ အရှိန်အဟုန်မြှင့် လုပ်ဆောင်လျက်ရှိပြီး ကာမီကာဇေ (Kamikaze) အသေခံ ဒရုန်းများဖြင့်ပါ အသုံးပြုတိုက်ခိုက်လာကြောင်း ဒေသတွင်းသတင်းရင်းမြစ်များထံမှ သိရသည်။
အမြောက်စစ်ဆင်ရေးကွပ်ကဲမှုဌာနချုပ် (မစခ – ၉၀၅) ၏ လက်နက်ကြီး ပစ်ကူများကိုရယူကာ ပြီးခဲ့ သည့် ဧပြီလ ၁၃ ရက်နေ့မှစတင်၍ နတ်ရေကန်စခန်းအနီး ရိုးတစ်လျှောက်တွင် စစ်ကူများ ပို့ဆောင်၍ တပ်ဖြန့်လှုပ်ရှားမှုများ ပြုလုပ်ခဲ့ခြင်းဖြစ်သည်။
”စစ်တပ်က လမ်းဟောင်း၊ လမ်းသစ်နှစ်ခုလုံးမှာ တပ်ဖြန့် ထိုးစစ်ဆင်လာတယ်။ လက်နက်ကြီး ပစ်အားရော ဒရုန်းပါသုံးပြီး စစ်ကူပို့ဖို့ကြိုးစားတာမှာ တိုက်ပွဲဖြစ်နေပြီး စစ်ကူ ကားတစ်စီးကို ဖျက်ဆီး ထားနိုင်တယ်လို့ သိရတယ်” ဟု သတင်းရင်းမြစ်က ဧရာဝတီတိုင်းမ်ကို ပြောသည်။
ယင်းနောက် ဧပြီ ၁၇ ရက်နေ့တွင် ပဇီလမ်းပိုင်း၌ အာရက္ခတပ်တော် (AA) နှင့် စစ်တပ်တို့အကြား တိုက်ပွဲပြင်းထန်စွာ ဖြစ်ပွားခဲ့သည်။ ဆက်လက်ပြီး ဧပြီလ ၁၉ ရက်နေ့တွင် နတ်ရေကန်ဗျူဟာ လမ်းဟောင်း မြောက်ဘက်ရှိ နောင်နှင့်လိုင်ရွာများသို့ စစ်တပ်က ကာမီကာဇေ အသေခံဒရုန်းများဖြင့် ပစ်ခတ်တိုက်ခိုက်ခဲ့ကြောင်း သိရသည်။
လက်ရှိအခြေအနေတွင် တောင်ယာတဲများ၌ စစ်ဘေးရှောင်နေကြရသည့် ဒေသခံပြည်သူများအနေဖြင့် လုံခြုံရေးအရ ပိုမိုဝေးကွာသည့်နေရာများသို့ ထပ်မံရွှေ့ပြောင်းကြရန် တော်လှန်ရေးအဖွဲ့များက သတိပေးနှိုးဆော်ထားသည်။
စစ်အုပ်စုအနေဖြင့် လက်နက်ကြီး ပစ်ကူများအပြင် ကာမီကာဇေ အသေခံဒရုန်းများကို စစ်မျက်နှာပြင် တွင် ပိုမိုအသုံးပြုလာခြင်းသည် တိုက်ပွဲ၏ပြင်းထန်မှုကို မြှင့်တင်လိုက်ခြင်းဖြစ်ပြီး ဒေသခံ တော်လှန်ရေး အဖွဲ့များအတွက်သာမက ဒေသခံများအတွက်ပါ ကြီးမားသောခြိမ်းခြောက်မှု ဖြစ်ကြောင်း စစ်ရေးသုံးသပ်သူများက ဆိုသည်။
ပုံစာ-စစ်အုပ်စုတပ်ဖွဲ့ဝင်များ
#နတ်ရေကန် #စစ်တပ် #တပ်ဖြန့် #ကာမီကာဇေ #အသေခံဒရုန်း #တိုက်ခိုက် #Ayeyarwaddy_Times
