ဧရာဝတီတိုင်းမ်
ဧပြီ ၂၀ ရက်
ကချင်ပြည်နယ်၊ ဖားကန့်မြို့နယ်အတွင်းရှိ လုံးခင်းနှင့် မှော်စီဆာဒေသတို့တွင် စစ်တပ်နှင့် ကချင်လွတ်လပ်ရေးတပ်မတော် (KIA) တို့အကြား တိုက်ပွဲများ ဆက်လက်ပြင်းထန်လျက်ရှိသည်။
လုံးခင်း၊ ဆောင်းချိန်ရပ်ကွက်တွင် ဧပြီလ ၁၉ ရက်နေ့မှစတင်၍ ယနေ့ ဧပြီ ၂၀ ရက် အထိ တိုက်ပွဲများ ဆက်လက်ဖြစ်ပွားနေပြီး အနီးနားတစ်ဝိုက်တွင်လည်း လက်နက်ကြီး ပစ်ခတ်သံများ ကြားနေရကြောင်း သိရသည်။
”ကျောက်ဝိုင်းလမ်းဆုံမှာ အင်အားအလုံးအရင်းရောက်လာတယ်ပြောတယ်။ လက်နက်ကြီးတွေနဲ့ပစ်လို့ လူသေတာရှိတယ်” ဟု ဖားကန့်ဒေသခံတစ်ဦးက ဧရာဝတီတိုင်းမ်ကို ပြောသည်။
ဖားကန့်ဗျူဟာကုန်းမှနေ၍ လက်နက်ကြီးများဖြင့် အဆက်မပြတ် ပစ်ခတ်တိုက်ခိုက်လျက်ရှိကာ ပြီးခဲ့သည့် ဧပြီ ၁၈ ရက်နေ့ကတည်းကပင် ဗျူဟာကုန်းမှ လက်နက်ကြီးဖြင့် အကြိမ်ရေ ၂၀ ထက်မနည်း ပစ်ခတ်မှုများ လုပ်ဆောင်ခဲ့သည်။
စစ်အုပ်စုက လုံးခင်းဒေသဘက်သို့ စစ်အင်အား ၅၀၀ ခန့်အထိ တိုးမြှင့်ပို့ဆောင်ထားပြီး ၎င်းတို့နှင့်အတူ ပြည်သူ့စစ်အဖွဲ့များလည်း ပူးပေါင်းပါဝင်နေကြောင်း သိရသည်။
ယမန်နေ့ ဧပြီ ၁၉ရက်နေ့က မှော်စီဆာနှင့်နမ္မဖြစ်ကြားကို စစ်ကြောင်းထိုးလာသည့် စစ်တပ်စစ်ကြောင်း ကြားဖြတ်တိုက်ခိုက်ခံရပြီး အစုလိုက်သေဆုံးထိခိုက်မှုရှိခဲ့သည်။
လက်ရှိတွင် နှစ်ဖက်တိုက်ပွဲများ ဆက်လက်ပြင်းထန်နေဆဲဖြစ်သည့်အတွက် ဒေသခံများအနေဖြင့် စိုးရိမ်မှုများ မြင့်တက်လျက်ရှိသည်။
