‎ဖားကန့်တွင် စစ်တပ်နှင့် ပြည်သူ့စစ်ပူးပေါင်းစစ်ကြောင်း ကြားဖြတ်တိုက်ခိုက်ခံရပြီး စစ်ကြောင်းပျက်၊ ထိခိုက်သေဆုံးမှုများပြား

‎ဧရာဝတီတိုင်းမ်
‎ဧပြီ ၁၉ရက်
‎
‎

ကချင်ပြည်နယ်၊ ဖားကန့်မြို့နယ်အတွင်း စစ်ကြောင်းထိုးရန် ပြင်ဆင်နေသည့် ရွေးတုအစိုးရ၏ စစ်တပ်နှင့် ပြည်သူ့စစ်ပူးပေါင်းစစ်ကြောင်းကို ကချင်လွတ်လပ်ရေးတပ်မတော် (KIA) က ကြားဖြတ် မိုင်းဆွဲတိုက်ခိုက်ခဲ့ရာ အထိနာပြီး စစ်ကြောင်းပျက်သွားခဲ့ကြောင်း သိရသည်။
‎

မှော်စီဆာနှင့် နမ္မဖြစ်ကြားရှိ တိုက်ပွဲနေရာသို့ အင်အား ၆၀ ခန့်ဖြင့် စစ်ကူသွားရောက်ရန် စစ်ကြောင်း ထိုးလာသည့် အဆိုပါအဖွဲ့ကို ‎ယနေ့ ဧပြီ ၁၉ရက်၊ နံနက် ၈ နာရီဝန်းကျင်က မလန်ဒုံရွာအကျော် အရောက်တွင် ကြားဖြတ်တိုက်ခိုက်ခြင်းနှင့် မိုင်းဆွဲတိုက်ခိုက်ခြင်းတို့ လုပ်ဆောင်ခဲ့ခြင်းဖြစ်ကြောင်း သိရသည်။
‎

‎”မိုင်းကွင်းအဖြတ်မှာ ဝင်တိုက်ခိုက်ခံလိုက်ရလို့ သေဆုံး၊ ပြတ်တောက်တွေများသွားတယ်။ စစ်တပ်က ပြည်သူ့ စစ်အဖွဲ့တွေကို ဆက်တိုက် တပ်ဖြန်နေတာပေါ့။ ကာမိုင်းဘက်က စစ်ကြောင်းထွက်တယ် ဆိုတာလည်း ပျောက်နေတယ်။ သေကုန်ပြီနေမယ်” ဟု ဖားကန့် သတင်းရင်းမြစ်က ဧရာဝတီတိုင်းမ်ကို ပြောသည်။
‎

‎အဆိုပါ တိုက်ခိုက်မှုကြောင့် စစ်တပ်နှင့် ပြည်သူ့စစ်အဖွဲ့ဝင် ၁၀ ဦးခန့် သေဆုံးပြီး ၃၀ ခန့် ဒဏ်ရာရ ရှိခဲ့ကာ စစ်ကြောင်းမှာ ပျက်စီးသွားခဲ့‌ကြောင်းဒေသခံသတင်းရင်းမြစ်များထံမှ သိရသည်။

‎
‎အဆိုပါစစ်ကြောင်းတွင် ဦးဇခုန်တိန့်ယိန်း၏ ပြည်သူ့စစ်၊ မင်းဇေသန့်၏ ဝါရာဇွပ်ပြည်သူ့စစ်၊ ဦးရွှေမင်း၏ လီဆူပြည်သူ့စစ်အဖွဲ့များနှင့် စစ်တပ် တပ်ဖွဲ့ဝင်များ ပူးပေါင်းပါဝင်ကြောင်း သိရသည်။
‎

စစ်တပ်သည် ပြည်သူ့စစ်အဖွဲ့များကို အဓိကအားထား၍ စစ်ကြောင်းထိုးခြင်း၊ နယ်မြေထိန်းသိမ်း ခြင်းများ ပြုလုပ်လာသည်။ ပူးပေါင်းဖွဲ့စည်းထားသည့် စစ်ကြောင်းများသည် တော်လှန်ရေးအဖွဲ့များ၏ ကြားဖြတ်တိုက်ခိုက်ခံနေရပြီး စစ်ကြောင်းပျက်အထိနာနေကြောင်း သိရသည်။
‎

မှော်စီဆာနှင့် နမ္မဖြစ်ကြား တိုက်ပွဲရင်ဆိုင်နေရသည့် အခြေအနေရှိနေပြီး စစ်တပ်အနေဖြင့် ထိုနေရာများကို ဆက်လက်ထိန်းချုပ်ရန် အသည်းအသန် ကြိုးပမ်းနေသည်။ ယခုကဲ့သို့ စစ်ကြောင်း ပျက်သွားခြင်းသည် တိုက်ပွဲဖြစ်ပွားနေသည့် နေရာများအတွက် စစ်ကူမရောက်နိုင်တော့သည့်အပြင် တပ်ကူရရှိရန် အခက်အခဲပိုမိုကြီးထွားလာကြောင်း သိရသည်။
‎
ကချင်လွတ်လပ်ရေးတပ်မတော် (KIA) သည် ယမန်နေ့ကလည်း ဟူးကောင်းဒေသရှိ ပြည်သူ့စစ်ကာကင်းစခန်း နှစ်ခုကို KIAက သိမ်းပိုက်နိုင်ခဲ့သည်။
‎
ပုံစာ-kIA တပ်ဖွဲ့ဝင်များ(ပုံဟောင်း)