ကျောက်ဖြူနှင့် ၇မိုင်အနီးထိ တိုက်ပွဲကပ်လာပြီး စစ်ကော်မရှင်တပ် ထိုးစစ်အရှိန်တန့်နေ

ဧရာဝတီတိုင်းမ်
‎မတ် ၁၀ ရက်
‎‎

ရခိုင်ပြည်နယ်၊ ကျောက်ဖြူမြို့နယ်တွင် စစ်ကော်မရှင်နှင့် အာရက္ခတပ်တော်တို့၏ တိုက်ပွဲမှာ ကျော်ဖြူမြို့အနီး ခုနှစ်မိုင်အထိကပ်လာကြောင်း သိရသည်။
‎‎

ယမန်နေ့ မတ် ၉ရက်နေ့တွင် ကျောက်ဖြူ လမ်းခွဲကိုကျော်လွန်ပြီး တိုက်ပွဲများဖြစ်ပွားကာ ကျောက်ဖြူမြို့နှင့် ၇မိုင်အကွာ မြို့တောင်ပိုင်းတွင် နေရာအနှံ့၌ တိုက်ပွဲများရှိနေကြောင်း ကျောက်ဖြူအခြေအနေကိုစောင့်ကြည့်နေသည့် little rabbit ထံမှ သိရသည်။
‎

“ကျောက်ဖြူတိုက်ပွဲစတော့ မြို့နဲ့ အတော်နီးကပ်လာတာ။ ပြီးတော့ မြို့နဲ့ဝေးဝေးသွားတာပေါ့။ သစ်ပုတ်တောင်ဌာနချုပ်ဘက်ဦးလည်သွားတာ။ စစ်တပ်ဘက်ကတော့ သူတို့လူနာတွေရော လူသေတွေရော ခလရ ၃၄ဘက်ပြန်သယ်တယ်။ ကျောက်ဖြူဆေးရုံဘက်ရောက်လာတာတွေလည်းရှိတယ်” ဟု ကျောက်ဖြူသတင်းရင်းမြစ်က ဧရာဝတီတိုင်းမ်ကိုပြောသည်။
‎

ယခုရက်ပိုင်းအတွင်း စစ်ကော်မရှင်ထိုးစစ်ရပ်တန့်နေပြီး မင်းပြင်၊ သိုင်းချောင်းဘက်ထွက်လာသည့်တပ်များလည်း AA၏ လက်နက်ကြီး၊ ဒရုန်းတို့ကြောင့် တပ်ပြန်ဆုတ်ထားရကြောင်း သိရသည်။
‎

ပြီးခဲ့သည့် မတ် ၅ရက်နေ့ကလည်း ဓညဝတီရေတပ်ဌာနချုပ်ကို AAက လက်နက်ကြီးများဖြင့် ပစ်ခတ်ခဲ့သည့်အတွက် ဗိုလ်အဆင့်ရှိသူများအပါအဝင် စစ်ကော်မရှင်တပ်ဖွဲ့ဝင် ၂၀ခန့်သေဆုံးကြောင်း ဒေသတွင်း သတင်းရင်းမြစ်များထံမှ သိရသည်။
‎

ကျောက်ဖြူမြို့နှင့် မိုင်အနည်းငယ်သာ ကွာသည့် ကုလာဘာ ကျေးရွာအထိ တိုက်ပွဲရောက်ရှိနေချိန်တွင် AAက တိုက်ပွဲကို ရေတပ်ဌာနချုပ်ဘက် ဦးတည်လိုက်ပြီးနောက် ယခု လမ်းခွဲကိုကျော်လွန်ကာ မြို့နှင့် ခုနှစ်မိုင်အကွာကို တိုက်ပွဲပြန်လည်ရောက်ရှိလာသည်။
‎

မင်းပြင်၊ သိုင်းချောင်း၊ ဒိုးမတောင်ရှိ စစ်ကော်မရှင်များရှိရာနေရာများကိုလည်း AAက ဒရုန်းနှင့် လက်နက်ကြီးများသုံး၍ ပစ်ခတ်ထားကြောင်း သိရသည်။
‎

ကျောက်ဖြူမြို့နယ်တိုက်ပွဲများအတွင်းမှ စစ်ကော်မရှင် သုံးဒါဇင်ခန့် AAတပ်ဖွဲ့ထံ လက်နက်ချ အညံ့ခံမှုများ ယခုရက်ပိုင်းအတွင်း ရှိခဲ့သည်။