ဧရာဝတီတိုင်းမ်
မတ် ၂ ရက်
စစ်ကော်မရှင်အဖွဲ့နှင့် စစ်တပ်၏ သတင်းများကို ကျယ်ကျယ်ပြန့်ပြန့်ရောက်ရှိ ပျံ့နှံ့စေရန်နှင့် တော်လှန်ရေးတပ်ဖွဲ့နှင့် လုပ်ငန်းစဉ်များကို တန်ပြန်သတင်းများဖြန့်ချိရန်အတွက် သတင်းလွှာ (Information sheet) ထုတ်ပြန်ရေးနှင့် တန်ပြန်သတင်းဖြန့်ချီရေးအဖွဲ့ကို ဖွဲ့စည်းထားကြောင်း သိရသည်။
လူမှုကွန်ရက်ပေါ်တွင် စစ်ကော်မရှင်အဖွဲ့ နှင့် စစ်တပ်ကို ထိုးနှက်တိုက်ခိုက်မှုများကို သတင်းတု၊ သတင်းမှားအဖြစ် အချိန်နှင့်တပြေးညီ တုန့်ပြန်ပြီး တော်လှန်ရေးတပ်ဖွဲ့များကို သောင်းကျန်းသူအဖြစ်သတ်မှတ်ကာ နှိမ်နင်းရေးလုပ်ငန်းစဉ်များ ပျံ့နှံ့စေကာ တန်ပြန်သတင်းများဖြန့်ချီရန် ပြီးခဲ့သည့် ဇန်နဝါရီ ၃၁ရက်က ဖွဲ့စည်းထားကြောင်း သိရသည်။
အဆိုပါအဖွဲ့၏ ခေါင်းဆောင်အဖြစ် ကာကွယ်ရေးဝန်ကြီးဌာန၏ ဒုတိယဝန်ကြီး ဗိုလ်ချုပ်အောင်မျိုးသန့်က ဦးဆောင်ထားပြီး စစ်ဥပဒေချုပ်ရုံး၊ ပြည်သူ့ဆက်ဆံရေးနှင့် စိတ်ဓာတ်စစ်ဆင်ရေး ညွှန်ကြားရေးမှူးရုံး၊ အမျိုးသားကာကွယ်ရေးနှင့် လုံခြုံရေးကောင်စီရုံးမှ သတင်းနှင့်လုံခြုံရေးဆိုင်ရာဌာနကြီး၊ ပြန်ကြားရေးဝန်ကြီးဌာန၊ စစ်ဘက်ရေးရာလုံခြုံရေးအရာရှိချုပ်ရုံး၊ နိုင်ငံခြားရေးဝန်ကြီးဌာန၊ ပြည်ထဲရေး၊ ပို့/ဆက်နှင့် တပ်မတော်လေ့ကျင့်ရေးအရာရှိချုပ်ရုံး စသည့် ဌာနများ ပါဝင်သည်။
ဒုတိယဝန်ကြီး၊ တွဲဖက်စစ်ဥပဒေချုပ်၊ ညွှန်ကြားရေးမှူးချုပ်များ ၊ ဒုညွှန်ချုပ်များ၊ ရဲမှူးကြီးနှင့်ဒုရဲချုပ်များပါဝင်သည့် သတင်းလွှာထုတ်ပြန်ရေးနှင့် တန်ပြန်သတင်းဖြန့်ချီရေးအဖွဲ့မှာ လုပ်ငန်းစဉ် ခုနှစ်ရပ်ကို အဓိကလုပ်ဆောင်မည်ဟု သိရသည်။
နေ့စဉ်သတင်းစာပါ မူဝါဒပိုင်းဆိုင်ရာ အရေးကြီးသတင်းများကို မြန်မာ၊ အင်္ဂလိပ်၊ ရုရှား၊ တရုတ် ဘာသာစကား လေးမျိုးဖြင့် ပြည်တွင်း၊ပြည်ပ သံရုံးများ၊ စစ်သံရုံးများကို အချိန်နှင့်တပြေးညီ ထုတ်ပြန်ပေးရမည်ဖြစ်သည်။
စစ်ကော်မရှင်အဖွဲ့နှင့် စစ်တပ်က တိုင်းကျိုးပြည်ပြုဟု ခေါင်းစဉ်တပ်လုပ်ဆောင်ချက်များကို နိုင်ငံတကာနှင့် ပြည်သူထံကျယ်ကျယ်ပြန့်ပြန့်ရောက်ရှိစေရန် လူမှုကွန်ရက် အသီးသီးမှ နည်းလမ်းမျိုးစုံနှင့်ဖြန့်ရန်၊ စစ်ကော်မရှင်နှင့်ဆန့်ကျင့်သည့်အဖွဲ့အစည်း သတင်းမီဒီယာများမှ ထုတ်ဝေသည့် သတင်းများကို သတင်းတု သတင်းမှားဟုဆိုကာ တုံ့ပြန်ချေဖျက်ရန်၊ လက်နက်ကိုင်လမ်းစဉ်ဖြင့် ဆန့်ကျင်တိုက်ခိုက်နေသူများကို သတင်းအချက်အလက် စစ်ဆင်ရေးပြုလုပ်ရန်တို့ပါဝင်သည်။
ထို့အပြင် ဝန်ကြီးဌာနအသီးသီးမှ ဝန်ထမ်းများ ယုံကြည်ချက်၊ ခံယူချက် မှန်ကန်လာစေရန်စိတ်ဓာတ်မြှင့်တင်ရေးသတင်းများရေးသားထုတ်ပြန်ရန်နှင့် ၎င်းတို့လုပ်ဆောင်နေသည့် တိုင်းကျိုးပြည်ပြု ခေါင်းစဉ်တပ်ထားသည့် လုပ်ဆောင်မှုသတင်းအချက်အလက်များကို စုဆောင်းခြင်း၊ ပြုစုရေးသားခြင်းများကို အဓိကလုပ်ဆောင်သွားရမည်ဖြစ်သည်။
ပုံစာ-အဖွဲ့ခေါင်းဆောင် ဗိုလ်ချုပ်အောင်မျိုးသန့်
