ဧရာဝတီတိုင်းမ်
ဇန်နဝါရီ ၂၂ ရက်
စစ်ကိုင်းတိုင်း၊ အင်းတော်မြို့နယ်၊ မော်လူးမြို့၊ မာန်ဟဲရွာထိပ်ကို စစ်ကော်မရှင်က ဗုံးကြဲတိုက်ခိုက်သည့်အတွက် ပကဖအဖွဲ့ဝင်များထိခိုက်သေဆုံးမှုရှိကြောင်း သိရသည်။
စစ်ကော်မရှင်က တိုက်လေယာဉ်ဖြင့် ယမန်နေ့ ဇန်နဝါရီ ၂၁ရက်နေ့ ည ၁၁ နာရီအချိန်ခန့်က ဗုံးနှစ်လုံး ကြဲချတိုက်ခိုက်ခဲ့ကြောင်း Indaw Revolution ကထုတ်ပြန်သည်။
အဆိုပါ ဗုံးကြဲချတိုက်ခိုက်မှုကြောင့် ကြည်သူ့ကာကွယ်ရေးအဖွဲ့ဝင်ငါးဦး သေဆုံးခဲ့ပြီး ပြည်သူနှစ်ဦး ထိခိုက်ဒဏ်ရာရရှိကာ နေအိမ်နှစ်လုံး၊ အဆောက်ဦးတစ်ခုပျက်စီးပြီး နွားတစ်ကောင်လည်း သေဆုံးခဲ့ကြောင်း သိရသည်။
”နေရာအတိအကျတွေနဲ့ ဗုံးကြဲနေတာပါ။ ကောလင်းကိစ္စဆိုလည်း တိုက်ပွဲအတွက် လူရှိနေချိန် အသေခံဒရုန်းတွေပါ စိုက်ဆင်းသွားတာ” ဟု သတင်းရင်းမြစ်က ဧရာဝတီတိုင်းမ်ကို ပြောသည်။
ပြီးခဲ့သည့် ဇန်နဝါရီ ၂ရက်နေ့ကလည်း မော်လူးမြို့၊ ပဲခူးရွာနဲ့ ရွာရှည်ကြားကို စစ်ကော်မရှင်က လေယာဉ်နှင့်ဗုံးကြဲခဲ့သည့်အတွက် G12 ကျောင်းသူတစ်ဦး သေဆုံးပြီး တစ်ဦး ဒဏ်ရာရရှိခဲ့သည်။
တော်လှန်ရေးတပ်ဖွဲ့များ၏ စခန်းနေရာများကို စစ်ကော်မရှင်က နေရာအတိအကျဖြင့် လေကြောင်းတိုက်ခိုက်လျက်ရှိရာ ပြီးခဲ့သည့် ဇန်နဝါရီ ၂၀ရက် နေ့လယ် နှစ်နာရီအချိန်ခန့်က ကောလင်းမြို့ အရှေ့ခြမ်းကို ဂျက်ဖိုက်တာဖြင့် ဗုံးသီး နှစ်လုံး၊ ကာမီကာဇေ အသေခံဒရုန်းများဖြင့် တိုက်ခိုက်ခဲ့ရာ ပကဖအဖွဲ့ဝင်များအပါအဝင် ကိုးဦး သေဆုံးခဲ့ကြောင်း သိရသည်။
ကောလင်းမြို့နယ်အတွင်းသို့ ဝန်းသို ခမရ ၁၁၁ နှင့် ခမရ ၁၂၀ တို့မှ အင်အား ၁၅၀ ဝန်းကျင်ရှိ စစ်ကြောင်းဝင်ရောက်လျက်ရှိပြီး လမ်းကြောင်းတစ်လျှောက်ရှိ တော်လှန်ရေးတပ်ဖွဲ့ဝင်များကို ဖမ်းဆီး သတ်ဖြတ်မှုများ ပြုလုပ်ခဲ့သည်။
ဓါတ်ပုံ- Indaw Revolution
ပုံစာ- ဗုံးကြဲတိုက်ခိုက်ခံရသည့် မာန်ဟဲရွာ
