‎ပြန်လွှတ်ပေးရန်ရည်ရွယ်ထားသည့် စစ်သုံ့ပန်းများနှင့် မိသားစုဝင်များကို စစ်ကော်မရှင်ကပြန်ဗုံးကြဲခဲ့၍ ၂၁ဦးသေဆုံးပြီး ၃၀ဒဏ်ရာရ

‎ဧရာဝတီတိုင်းမ်
‎ဇန်နဝါရီ ၂၁ ရက်
‎

တိုက်ပွဲများအတွင်း AA ကဖမ်းမိထားသည့်စစ်သုံ့ပန်းများနှင့် မိသားစုဝင်များကို ထားရှိသည့် နေရာကို စစ်ကော်မရှင်က လေကြောင်းမှ ဗုံးကြဲတိုက်ခိုက်သည့်အတွက် အစုလိုက်အပြုံလိုက်သေဆုံးမှုဖြစ်ခဲ့ကြောင်း သိရသည်။
‎

ကျောက်တော်နှင့် ပုဏ္ဏားကျွန်းအစပ်ရှိ ချောင်းတူ (ခ) ဆောင်းဒုံကျေးရွာ အနောက်ဘက်ရှိ စစ်သုံ့ပန်းနှင့် မိသားစုဝင်များကို ထားရှိရာ နေရာကို စစ်ကော်မရှင်က ယမန်နေ့ ဇန်နဝါရီ ၂၀ရက် ညပိုင်းက ဗုံးကြဲတိုက်ခိုက်သည့်အတွက် ၂၁ဦးသေဆုံးပြီး ၃၀ဦး ဒဏ်ရာရရှိခဲ့ကြောင်း ဒေသတွင်း သတင်းများမှ သိရသည်။
‎

ဂျက်ဖိုက်တာ နှစ်စင်းဖြင့် ပေါင် ၃၀၀ ဗုံး လေးလုံးကို စစ်သုံ့ပန်းများအားဆေးကုသပေးနေသည့် ဆေးခန်း၊ ဆေးခန်းဝန်းကျင်၊ စစ်သုံ့ပန်းများ၏ အမျိုးသမီးနှင့်ကလေးများထားရာအဆောင်နှင့် စစ်သုံ့ပန်း အမျိုးသားဆောင်တို့ကို ကြဲချတိုက်ခိုက်ခဲ့သည်။
‎

တိုက်ပွဲများအတွင်း အကြောင်းအမျိုးမျိုးဖြင့် AAထံ‌ရောက်ရှိလာသည့် စစ်သုံ့ပန်းနှင့်မိသားစုဝင်များကို ပြန်လွှတ်ပေးရန် စီစဉ်ထားပြီးချိန်တွင် စစ်ကော်မရှင်က ၎င်းတို့တပ်ဖွဲ့ဝင်နှင့် မိသားစုဝင်များကို ပစ်မှတ်ထား တိုက်ခိုက်ခဲ့ခြင်းဖြစ်သည်။
‎

ပြီးခဲ့သည့်နှစ်ကလည်း မြောက်ဦး၊ ရမ်းချောင်းရှိ စစ်သုံ့ပန်းများထားရှိရာနေရာကို စစ်ကော်မရှင်က ဗုံးကြဲတိုက်ခိုက်ခဲ့ပြီး လူအစုလိုက်အပြုံလိုက်သေဆုံးခဲ့သည်။
‎

ဓာတ်ပုံ- One Nation News
‎ပုံစာ- ဗုံးကြဲခံရပြီး သေဆုံးသူများနှင့် ပူဆွေးနေသည့် မိသားစုဝင်များ