စစ်တွေ ဒကစအတွင်းကို AAက လက်နက်ကြီးများဖြင့်ပစ်ခတ်၊ စစ်ကော်မရှင်တပ်သားများကို လူနာတင်ယာဉ်များနှင့်ခေါ်ထုတ်ယူရ

‎ဧရာဝတီတိုင်းမ်
‎ဒီဇင်ဘာ ၉ ရက်

‎စစ်တွေမြို့ရှိ စစ်ကော်မရှင်၏ ဒေသကွပ်ကဲမှုဆိုင်ရာ ဌာနချုပ်ကို AAပစ်ခတ်လိုက်သည့် လက်နက်ကြီးကျည်များကျရောက်ပေါက်ကွဲသည့်အတွက် စစ်ကော်မရှင်တပ်ဖွဲ့ဝင်များ ထိခိုက်မှုများကြောင်း သိရသည်။

‎ပြီးခဲ့သည့် ဒီဇင်ဘာ ၇ရက်နေ့ ညပိုင်းအချိန်က စစ်တွေမြို့စစ်ကော်မရှင်ဘက်မှ လက်နက်ကြီးများဖြင့် စတင်ပစ်ခတ်ပြီးနောက် AA ဘက်ကလည်း ဒကစအတွင်းကို ပြန်လည်ပစ်ခတ်ခဲ့ကြောင်း ဒေသတွင်း သတင်းရင်းမြစ်များထံမှ သိရသည်။

‎”ဒကစထဲကို AAက ရက်ခြားလို ပြန်လည်ပစ်ခတ်ထားတော့ တပ်မိသားစုဝင်အချို့ကိုပြောင်းရွှေ့ထုတ်ယူထားတယ်။ ၇ရက်နေ့က ပစ်ချက်တွေမှာ ထိခိုက်မှုရှိတယ်လို့ သိရပါတယ်” ဟု ရခိုင်သတင်းရင်းမြစ်က ဧရာဝတီတိုင်းမ်ကို ပြောသည်။

‎ပစ်ခတ်မှုပြီးနောက် စစ်တွေမြို့အတွင်း လူနာတင်ယာဉ်များ အသွားအလာရှုပ်ထွေးသွားသည်ဟု မျက်မြင်ဒေသခံများ၏ ပြောပြချက်ကို Lay Wady FM ကအတည်ပြုဖော်ပြထားသည်။

‎ဒဏ်ရာရ တပ်ဖွဲ့ဝင်များကို လူနာတင်ယာဉ်နှင့် ခေါ်ယူသွားသလို စစ်သုံးကားများဖြင့်လည်း တင်ဆောင်သွားကြောင်း သိရသည်။

‎ပြီးခဲ့သည့် ဒီဇင်ဘာ ၂ရက်နေ့ကလည်း စစ်တွေ ဒကစအတွင်းကို AAကလက်နက်ကြီးများဖြင့် ပစ်ခတ်ခဲ့ပြီး ထိခိုက်သေဆုံးမှုရှိကြောင်း သိရသည်။

‎စစ်ကော်မရှင်က နိုဝင်ဘာလအတွင်းမှစကာ AAထိန်းချုပ်သည့် ရသေ့တောင်၊ ပုဏ္ဏားကျွန်း၊ ပေါက်တောမြို့နယ်များကို လက်နက်ကြီး၊ ဒရုန်းများဖြင့် ဆက်တိုက်ပစ်ခတ်ခဲ့ပြီး AAက ဒကစရှိရာကို ပြန်လည်ပစ်ခတ်မှုများ ပြုလုပ်ခဲ့သည်။

‎စစ်တွေမြို့ရှိ တပ်ရင်း၊ တပ်ဌာနချုပ်များကို စစ်ကော်မရှင်က ကာကွယ်ရေးများအဆင့်မြှင့်ထားပြီး မြေအောက် ဥမင်လှိုဏ်ခေါင်းများပါဖောက်၍ စစ်ရေးပြင်ဆင်ထားကြောင်း သိရသည်။

‎မြို့အစပ်ရှိ ကျေးရွာအများစုကိုလည်း အတင်းအကျပ် ရွှေ့ပြောင်းခိုင်းခဲ့ပြီး ကာကင်းစခန်းများ အခိုင်အမာတည်ဆောက်ထားကြောင်း သိရသည်။