ဧရာဝတီတိုင်းမ်
ဒီဇင်ဘာ ၈ ရက်
အမျိုးသားညီညွတ်ရေးအစိုးရ (NUG) အဖွဲ့ကို ယခုနှစ်ကုန်ပိုင်းတွင် အပြောင်းအလဲ ပြုလုပ်မည်ဟု ထုတ်ဖော်ပြောဆိုထားပြီးနောက် ဒုတိယဝန်ကြီးအဆင့်ရှိသူများကို ရာထူးတိုးမြှင့်ပေးခြင်း၊ ဝန်ကြီးဌာ နများကို ပေါင်းစည်းလျှော့ချခြင်းများဖြင့် NUG အစိုးရအဖွဲ့ကို ပြင်ဆင်ဖွဲ့စည်းလိုက်ကြောင်း ပြည်ထောင်စု လွှတ်တော်ကိုယ်စားပြုကော်မတီ (CRPH) က ထုတ်ပြန်သည်။
NUG အစိုးရအဖွဲ့ကို ဝန်ကြီးဌာန ၁၇ နေရာမှ ၁၂ ဌာနအထိ လျှော့ချ ပြင်ဆင်ဖွဲ့စည်းခဲ့ရာတွင် နိုင်ငံတော်သမ္မတ ဦးဝင်းမြင့်၊ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ နိုင်ငံတော် ဒုတိယသမ္မတ (ယာယီသမ္မတ) ဒူဝါလရှီးလ နှင့် ပြည်ထောင်စုဝန်ကြီးချုပ် မန်းဝင်းခိုင်သန်း တို့မှာ မူလအတိုင်း ပါဝင်ခဲ့သည်။
ယခင် ကျန်းမာရေးနှင့် ပညာရေးဝန်ကြီးဌာန ဝန်ကြီးအဖြစ် တာဝန်ယူခဲ့သော ဒေါက်တာ ဇော်ဝေစိုး ကို ပြည်ထောင်စုဝန်ကြီး (ပြည်ထောင်စုဝန်ကြီးချုပ်ရုံးဝန်ကြီး) အဖြစ် ပြောင်းလဲ တာဝန်ပေးအပ်ခဲ့သည်။
ပညာရေးဝန်ကြီးဌာန ဒုတိယဝန်ကြီး ဂျာထွယ်ပန် သည် ပညာရေးဝန်ကြီးအဖြစ် ရာထူးတိုးမြှင့်ခံရပြီး ကျန်းမာရေးဝန်ကြီးဌာန ဒုတိယဝန်ကြီး ဒေါက်တာရွှေပုံ သည်လည်း ကျန်းမာရေးဝန်ကြီးအဖြစ် ရာထူးတိုးမြှင့် တာဝန်ယူခဲ့သည်။
ထို့အပြင် ယခင် လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီး ဌာနကို လူမှုကူညီရေး၊ အလုပ်သမားနှင့် လူသားချင်းစာနာထောက်ထားရေးဝန်ကြီးဌာန အဖြစ် ပြောင်းလဲပေါင်းစည်းလိုက်သည်။ ယင်းဌာနတွင် ဒေါက်တာ ဝင်းမြတ်အေး က ပြည်ထောင်စု ဝန်ကြီးအဖြစ် ဆက်လက်တာဝန်ယူပြီး ဒေါက်တာ ငိုင်းတမ်မောင်း က ဒုတိယဝန်ကြီးအဖြစ် ပါဝင်သည်။
(၁)အမျိုးသမီး၊ လူငယ်နှင့် ကလေးသူငယ်ရေးရာဝန်ကြီးဌာန၊ (၂)ဆက်သွယ်ရေး၊ သတင်းအချက် အလက်နှင့် နည်းပညာဝန်ကြီးဌာန၊ (၃) စီးပွားရေးနှင့် ကူးသန်းရောင်းဝယ်ရေးဝန်ကြီးဌာန အပါအဝင် (၄) အပြည်ပြည်ဆိုင်ရာ ပူးပေါင်းဆောင်ရွက်ရေးဝန်ကြီးဌာနတို့မှာမူ လျော့ချထားပြီး ပါဝင်လာခြင်း မရှိသည်ကိုတွေ့ရသည်။
နိုင်ငံတကာပူးပေါင်းဆောင်ရွက်ရေးဝန်ကြီး ဒေါက်တာဆာဆာသည် ၎င်း၏ဝန်ကြီးဌာနကို ဖျက်သိမ်း တော့မည်ဖြစ်ကြောင်း ယာယီသမ္မတ၊ CRPH ဥက္ကဋ္ဌတို့က အသိပေးအကြောင်းကြားခဲ့၍ ၎င်း၏ တာဝန်ထမ်းဆောင်မှုများ အခန်းကဏ္ဍတစ်ခု ပြီးဆုံးသွားပြီဖြစ်ကြောင်း ပြီးခဲ့သည့် ဒီဇင်ဘာ ၁ ရက်နေ့တွင် လူမှုကွန်ရက် စာမျက်နှာမှတစ်ဆင့် အသိပေးခဲ့ပြီးဖြစ်သည်။
ဓာတ်ပုံ – CRPH , NUG
