စစ်တွေတွင် AAနှင့် စစ်ကော်မရှင်တို့ လက်နက်ကြီးတိုက်ပွဲဆင်နွှဲနေ

‎ဧရာဝတီတိုင်းမ်
‎အောက်တိုဘာ ၂၇ရက်

‎ရခိုင်ပြည်နယ်၊ စစ်တွေမြို့တွင် စစ်ကော်မရှင်နှင့် အာရက္ခတပ်တော် (AA)တို့ လက်နက်ကြီးများဖြင့် အပြန်အလှန်ပစ်ခတ်နေကြောင်း သိရသည်။

‎ယမန်နေ့ အောက်တိုဘာ ၂၆ရက်နေ့မှ ယနေ့အောက်တိုဘာ ၂၇ရက် နံနက်ပိုင်းအထိ လက်နက်ကြီး ပစ်ခတ်တိုက်ခိုက်မှုများ ရှိနေကြောင်း ဒေသတွင်း သတင်းရင်းမြစ်များထံမှ သိရသည်။

‎”စစ်တပ်ဘက်က ပုဏ္ဏားကျွန်း၊ ပေါက်တောနဲ့ ရသေ့တောင်ဘက်ကို လက်နက်ကြီးတွေနဲ့ ပစ်နေတာ ကနေ အခု AA ကပါပြန်ပစ်တယ်” ဟု စစ်တွေရှိ သတင်းရင်းမြစ်က ဧရာဝတီတိုင်းမ်ကို ပြောသည်။

‎AA ပစ်ခတ်လိုက်သည့် လက်နက်ကြီးအချို့မှာ စစ်တွေ ဒေသကွပ်ကဲမှုဆိုင်ရာ ဌာနချုပ် ဒကစ အတွင်း ကျရောက်ပေါက်ကွဲပြီး စစ်ကော်မရှင်တပ်ဖွဲ့ဝင်အချို့သေဆုံးကာ ‎စစ်ကော်မရှင်က လက်နက်ကြီး၊ ဒရုန်းဗုံးများသုံး၍ ပုဏ္ဏားကျွန်းမြို့နယ်ကို ပစ်ခတ်တိုက်ခိုက်မှုများပြုလုပ်ခဲ့ကြောင်း သိရသည်။

စစ်ကော်မရှင်သည် ‎ပုဏ္ဏားကျွန်းမြို့ကို လက်လွှတ်ခဲ့ရစဉ်က AA တပ်များ စစ်တွေမြို့ကို ရောက်မလာ စေရန်အတွက် မင်းချောင်းတံတားကို ချိုးဖျက်ခဲ့ရာ ယခု အဆိုပါမင်းချောင်းတံတားကို ပြန်လည်ပြင်ဆင် ထားကြောင်း သိရသည်။

‎စစ်တွေ- ပုဏ္ဏားကျွန်း ဆက်သွယ်ထားသည့် မင်းချောင်းတံတားကို ပြင်ဆင်မှုများလုပ်ဆောင်ပြီး တံတားထိပ်နှစ်ဖက်တွင် ခံစစ်အခိုင်အမာပြင်ဆင်ကာ လူအင်အား ချထားကြောင်း ဒေသခံများထံမှ သိရသည်။

‎စစ်တွေမြို့ ရွှေမင်းဂံရှိ စစ်ကော်မရှင်ရေတပ်နှင့် ပင်လယ်ပြင်ရှိ စစ်သင်္ဘောများမှနေ၍ လက်နက်ကြီး များဖြင့် ပုဏ္ဏားကျွန်းနှင့် ရသေ့တောင်မြို့နယ်များကို ပစ်ခတ်တိုက်ခိုက်မှုများ ပြုလုပ်လျက်ရှိရာ AAတပ်ဖွဲ့များကလည်း စစ်ကော်မရှင်တပ်များရှိရာ နေရာများနှင့် ဒကစအတွင်းကို ပြန်လှန်ပစ်ခတ် နေကြောင်း ဒေသတွင်း သတင်းရင်းမြစ်များထံမှ သိရသည်။

ဓာတ်ပုံ-AA Info Desk (ပုံဟောင်း)