ဧရာဝတီတိုင်းမ်
အောက်တိုဘာ ၂၇ရက်
ဧရာဝတီတိုင်း၊ ရေကြည်မြို့နယ်နှင့် လေးမျက်နှာမြို့နယ်တို့တွင် စစ်ကော်မရှင်တပ်နှင့် အာရက္ခ တပ်တော် (AA) ပူးပေါင်းတပ်များ ထိတွေ့တိုက်ပွဲများ ပြန်လည်ဖြစ်ပွားနေကြောင်း သိရသည်။
AA ပူးပေါင်းတပ်များသိမ်းပိုက်ထားသည့် လေးမျက်နှာမြို့နယ် စက်စက်ယိုရွာနှင့် ရွာအတွင်းရှိ တောင်ပေါ်ကျောင်းတို့ကို စစ်ကော်မရှင်တပ်များက ပိတ်ဆို့တိုက်ခိုက်လာကြောင်း သတင်းရင်းမြစ် များထံမှ သိရသည်။
”ရေကြည်ဘက်မှာလည်း ပွဲစနေပါတယ်။ ၂၄ရက်နေ့နဲ့ ၂၅ရက်နေ့ညတွေမှာ ပေါက်ကွဲသံတွေ ပြန်ကြား နေရပါတယ်” ဟု ရေကြည်ဒေသခံတစ်ဦးက ဧရာဝတီတိုင်းမ်ကို ပြောသည်။
ထို့သို့ ပိတ်ဆို့ပြီးနောက် တိုက်ပွဲဖြစ်ပွားခဲ့ရာ နှစ်ဖက်တပ်ဖွဲ့ဝင်များ ထိခိုက်သေဆုံးမှုရှိကြောင်း သိရသည်။ စစ်ကော်မရှင်တပ်နှင့် AA ပူးပေါင်းတပ်များသည် ပြီးခဲ့သည့် အောက်တိုဘာ တတိယပတ် အစမှ စတင်ကာ စက်စက်ယိုရွာအနီးတွင် တိုက်ပွဲများဖြစ်ပွားခဲ့ပြီး စစ်ကော်မရှင်က အင်အားတိုးချဲ့ စစ်ကူပို့မှုများ ရှိခဲ့သည်။
ပြီးခဲ့သည့် အောက်တိုဘာ ၁၁ရက်နေ့က အင်အားအပြည့်ပါဝင်သော စစ်ကော်မရှင်၏ စစ်သုံးကားကြီး အစီး ၂၀ သည် ဟင်္သာတမှနေ၍ ကွင်းကောက်ဖက်ကိုတက်ကာ လေးမျက်နှာသို့ ဆက်သွယ်ရေး လမ်းကြောင်းပြောင်းပြီး စစ်ကူပို့ခဲ့ကြောင်း သိရသည်။
ရေကြည် အမြောက်တပ်အနီးတွင်လည်း ထိတွေ့တိုက်ပွဲရှိနေပြီး စစ်ကော်မရှင်သည် စစ်ရေးနှင့် မဆိုင်သည့် စပြင်ရွာကို ပြီးခဲ့သည့် အောက်တိုဘာ ၂၃ ရက်နေ့က ဂျက်ဖိုက်တာ သုံးစင်းဖြင့် လေကြောင်းမှဗုံးကြဲတိုက်ခိုက်ခဲ့ရာ စစ်ဘေးရှောင်များအပါအဝင် ဒေသခံ ၂၄ဦးအထိသေဆုံးခဲ့ပြီး ၂၀ကျော်ဒဏ်ရာရရှိခဲ့သည်။
ရေကြည်အမြောက်တပ်မှနေ၍လည်း လက်နက်ကြီးများဖြင့် အနီးပတ်ဝန်းကျင်ရွာများကို ပစ်ခတ် တိုက်ခိုက်မှုများကိုပါ ပြုလုပ်လျက်ရှိသည်။ စစ်ကော်မရှင်သည် အမြောက်တပ်အနီးရှိ ကျေးရွာများကို ပြောင်းရွှေ့ခိုင်းထားပြီး ကာကင်းစခန်းများအခြေပြုကာ ဘန်ကာများဆောက် ဆက်သွယ်ရေး တူးမြောင်းနှင့် ကတုတ်ကျင်းများပါတူးထားကြောင်းသိရသည်။
ထို့အပြင်ကျုံပျော်အခြေစိုက်တပ်မှ ထုတ်နှုတ်အင်အားများနှင့် စစ်မှုထမ်းသင်တန်းဆင်းတပ်သား သစ်များ၊ ရက်တိုသင်တန်းပေးထားသည့် ပြည်သူ့စစ်များဖြင့် အမြောက်တပ်အတွင်း အင်အား ဖြည့်ထားသည်။ ရေနံ့သာလမ်းဆုံတွင်လည်း အင်အားအပြည့်ဖြင့်စောင့်ကြပ်နေကြပြီး ကာကင်းစခန်း ငယ်များဖြင့်ပါ အင်အားတိုးထားကြောင်း သိရသည်။
စစ်ကော်မရှင်က လာမည့်ဒီဇင်ဘာ ၂၈ရက်တွင်ကျင်းပမည့် ရွေးကောက်ပွဲအပိုင်း(၁)အတွက် ဧရာဝတီ တိုင်းတစ်ခုလုံးကို နယ်မြေစိုးမိုးမှုရယူလိုနေပြီး လတ်တလော စစ်ရေးတင်းမာနေသည့် သာပေါင်း၊ ရေကြည်၊ လေးမျက်နှာ၊ အင်္ဂပူမြို့နယ်များကို အမြန်ဆုံးထိန်းချုပ်လိုနေကြောင်း သတင်းရင်းမြစ် များထံမှ သိရသည်။
ဓာတ်ပုံ-AA Info Desk
ပုံစာ-ဧရာ၀တီ-ရခိုင် အစပ်တွင် တွေ့ရသည့် AA တပ်ဖွဲ့ဝင်များ (ပုံဟောင်း)
