ကာကင်းစခန်း ၂ ခုကို AA နှင့်မဟာမိတ်များ ထပ်မံသိမ်းပိုက်၍ ကပစ ၁၆ အနီး ၄ မိုင်ဝန်းကျင်သို့ ရောက်ရှိ

ဧရာဝတီတိုင်းမ်
အောက်တိုဘာ ၂၅ ရက်

ပန်းတောင်းမြို့နယ်၊ မသုန်ရွာအနီးရှိ ကပစ ၁၆ ၏ အဓိကပွိုင့်ကုန်းနှင့် ကာကင်းစခန်းများ အသိမ်းခံလိုက်ရသည့်အတွက် ယင်းစခန်းများကို ပြန်လည်ရယူရန် စစ်ကော်မရှင်ဘက်မှ ထိုးစစ်ဆင်တိုက်ခိုက်လာကြောင်း သိရသည်။

စစ်ကော်မရှင်က ၆၆၆ ပွိုင့်ကုန်းကို ပြန်လည်ရယူရန်အတွက် မြေပြင်ထိုးစစ်များအပြင် လက်နက်ကြီး ပစ်ကူ လေကြောင်းပစ်ကူများဖြင့် စစ်ကြောင်းထိုးလာရာ ပွိုင့်ကုန်းနှင့် မိုင်ဝက်ခန့်အကွာတွင် တိုက်ပွဲအပြင်း အထန်ဖြစ်ပွားခဲ့ကြောင်း သိရသည်။

“၂၃ ရက်နေ့က တိုက်ပွဲအပြင်းအထန်ဖြစ်ပြီးတော့ လေယာဉ်မျိုးစုံသုံးပြီး ၁၀ ကြိမ်လောက်ကို ဗုံးလာကြဲတယ်။ အဲဒီကြားထဲက ကာကင်းစခန်းနှစ်ခုကို AA က ထပ်သိမ်းလိုက်တယ်လို့ သိရပါတယ်”ဟု စစ်ရေးသတင်းရင်းမြစ်က ဧရာဝတီတိုင်းမ်ကို ပြောသည်။

AA နှင့်ပူးပေါင်းတပ်ဖွဲ့များ၏ တန်ပြန်ထိုးစစ်ကြောင့် စစ်ကော်မရှင်တပ်များ နောက်ဆုတ်ပေးလိုက်ရသည့်အပြင် ကာကင်းခစန်းနှစ်ခုကိုပါ ယမန်နေ့ အောက်တိုဘာ ၂၄ ရက်နေ့တွင် စစ်ကော်မရှင်က ထပ်မံလက်လွှတ်လိုက်ရကြောင်း သိရသည်။

AA နှင့် ပူး ပေါင်းတပ်ဖွဲ့များ၏ ထိုးစစ်မှာ ကပစ ၁၆ နှင့် လေးမိုင်အကွာခန့်သို့ ရောက်ရှိနေပြီဖြစ်ပြီး စစ်ကော်မရှင်က လေကြောင်းနှင့် ဒရုန်းတို့ဖြင့် အဆက် မပြတ် ခုခံနေကြောင်း သိရသည်။

စစ်ကော်မရှင်တပ်က ပွိုင့် ၆၆၆ စခန်းမကျခင် ညောင်ကျိုးနှင့် တောင်ကုတ်လမ်းကြောင်းကို ဦးတည်တိုက်ခိုက်ပြီး လေသာတောင်ကြောကိုပါ စစ်ကြောင်း ထိုးနေခဲ့ရာမှ ယခုရက်ပိုင်းတွင် ကပစ ၁၆ ကို ကာကွယ်ရန် စစ်ကြောင်းများ ၆၆၆ ပွိုင့်ကုန်းအနီးထိ ဦးတည်လာခြင်းဖြစ်သည်။

ကပစ ၁၆ ယမ်းချက်စက်ရုံတွင် စစ်ကော်မရှင်တပ်များ အင်အားထပ်တိုးထားပြီး မသုန်ချောင်းဖျားတစ်ဝိုက်နှင့် စက်ရုံအနီးတွင် တိုက်ပွဲများ နီးကပ်စွာ ဖြစ်ပွားနေကြောင်း သတင်းရင်းမြစ်ထံမှ သိရသည်။

ယမန်နေ့ အောက်တိုဘာ ၂၄ ရက်နေ့ကလည်း စစ်ကော်မရှင်က မသုန်ကျေးရွာအနီးတစ်ဝိုက်သို့ စစ်ကူအင်အား ၂၀၀ ခန့် ထပ်မံပို့ဆောင်ခဲ့ကြောင်း ဒေသခံများထံမှ သိရသည်။