ရခိုင်-ပဲခူးအစပ် တိုက်ပွဲများကို AA အနေဖြင့် အရှိန်မြှင့် ထိုးစစ်ဆင်ပြီးနောက် နာရီပိုင်းအတွင်း စစ်ကော်မရှင်၏ ၆၆၆ ကာကင်းစခန်းကို သိမ်းပိုက်ခဲ့

ဧရာဝတီတိုင်းမ်
အောက်တိုဘာ ၁၇ ရက်

ပဲခူးတိုင်း၊ ပန်းတောင်းမြို့နယ်၊ ပန်းကန်ကွဲကျေးရွာတောင်ဘက် ၉ ကီလိုမီတာအကွာရှိ စစ်ကော်မရှင်၏ ကာကင်းစခန်း ၆၆၆ ပွိုင့်ကုန်းကို အာရက္ခတပ်တော်(AA)က သိမ်းပိုက်နိုင်ခဲ့ကြောင်း သိရသည်။

AA သည် တန်ပြန်ထိုးစစ်အနေဖြင့် ပဲခူးတိုင်း၊ ပန်းတောင်းမြိုနယ်၊ ပုဂံဂွေ့ (ပန်းကန်ကွဲ) ကျေးရွာ တောင်ဘက် ၉ ကီလိုမီတာအကွာအဝေး၌ရှိသည့် စစ်ကော်မရှင်၏ ၆၆၆ ပွိုင့်ကုန်းကို အောက်တိုဘာလ ၁၄ ရက်၊ နံနက် ၉ နာရီ ၅ မိနစ်တွင် စတင်ထိုး စစ်ဆင်တိုက်ခိုက်ခဲ့သည်ဟု ဆိုထားသည်။

အဆိုပါ ပွိုင့်ကုန်းနှင့် အနီးတစ်ဝိုက်တွင် တိုက်ပွဲဖြစ် ပွားနေခဲ့သည်မှာ ကာလအတန်ကြာခဲ့ပြီဖြစ်သော်လည်း အောက်တို ဘာ ၁၄ ရက်နေ့မှစ၍ AA ၏ ထိုး စစ်အရှိန်ကို မြှင့်၍တိုက်ခိုက်ခဲ့ပြီးနောက် ၃ နာရီခန့် သုံးဖက်သုံးတန်မှ ထိုးစစ်ဆင်တိုက်ခိုက်မှုအပြီးတွင် အဆိုပါစခန်းကို သိမ်းပိုက်ရယူနိုင်ခဲ့ကြောင်း AA ကထုတ်ပြန်သည်။

စစ်ကော်မရှင်၏ ပွိုင့် ၆၆၆ စခန်းတစ်ခုလုံးကို သိမ်းပိုက်စဉ်တွင် အလောင်းတချို့အပြင် လက်နက်ခဲယမ်းနှင့် စစ်အသုံး အဆောင်ပစ္စည်းအချို့ကို သိမ်း ဆည်းရရှိခဲ့‌ကြောင်း သိရသည်။

ရခိုင်-ပဲခူးတိုင်းအစပ်၊ ရခိုင်-မကွေးတိုင်းအစပ်၊ ရခိုင် -ဧရာဝတီတိုင်း အစပ်တို့တွင် စစ်ကော်မရှင်၏ ထိုးစစ်များကို AA တပ်၏ အကောင်းဆုံးခံစစ်များနှင့်အတူ တန်ပြန်ထိုးစစ်များဖြင့် ဟန်ချက်ညီဆင်နွှဲလျက်ရှိပြီး စစ်ကော်မရှင်တပ်နှင့် AA တို့ နှစ်ဖက်ရင်ဆိုင်ထားသည့် နေရာများတွင် တိုက်ပွဲများ နေ့စဥ်နီးပါး ဆက်လက်ပြင်းထန်လျက်ရှိသည်ဟု AA ထုတ်ပြန်ချက်တွင် ဖော်ပြထားသည်။

လက်ရှိတွင် AA နှင့်ပူးပေါင်းတပ်ဖွဲ့တို့မှာ ပန်းတောင်း မြို့နယ်အတွင်း၌ ပြန်လည်၍အရှိန်မြှင့်ကာ ထိုးစစ်ဆင်လာသည့်အတွက် စစ်ကော်မရှင်တပ်သည် အမှတ်(၁၆)ကာကွယ်ရေးပစ္စည်းစက်ရုံ (ကပစ-၁၆) အတွင်းနှင့် ခံစစ်များတွင် အင်အားများတိုးချဲ့ကာ ဖြည့်တင်းထားပြီး အနီး‌ရှိ ကျေးရွာများကိုလည်း သွား လာခွင့်ပိတ်ထားမှုများရှိကြောင်း ဒေသခံများထံမှ သိရသည်။

ဓာတ်ပုံ-AA
ပုံစာ- စစ်ကော်မရှင်၏ ကာကင်းစခန်း ၆၆၆ ပွိုင့်ကုန်းကို AA သိမ်းပိုက်ပြီးနောက် တွေ့ရစဉ်။