မောင်တောတွင် စစ်ကော်မရှင်ထောင်ခဲ့သည့် မိုင်းအလုံးရေ ရာချီကို AA ရှင်းလင်း

‎ဧရာဝတီတိုင်းမ်
‎စက်တင်ဘာ ၇ရက်
‎

‎ရခိုင်ပြည်နယ်၊ မောင်တောမြို့နယ်အတွင်းတွင် စစ်ကော်မရှင်ထောင်ထားခဲ့သည့် မိုင်အလုံးရေ ရာချီကို အာရက္ခတပ်တော် (AA ) မိုင်းရှင်းလင်းရေးအဖွဲ့များက ရှင်းလင်းနေကြောင်း သိရသည်။
‎

မောင်တောမြို့တွင် စစ်ကော်မရှင်ထောင်ထားခဲ့သော မြေမြှုပ်မိုင်းအလုံးရေ ၁၂၈လုံးကို ‎စက်တင်ဘာ ၅ရက်နေ့နှင့် ယမန်နေ့ စက်တင်ဘာ ၆ ရက်နေ့တို့တွင် AA က ရှင်းလင်းခဲ့ကြောင်း ဒေသတွင်း သတင်း ရင်းမြစ်များထံမှ သိရသည်။
‎
‎

မောင်တောဒေသအတွင်း နေရပ်ပြန်နေထိုင်သူအရပ်သားများ အန္တရာယ်ကင်းရှင်းရေးအတွက် စစ်ကော်မရှင်တပ်စွဲခဲ့သည့်နေရာများ၊ တိုက်ပွဲဖြစ်ပွားခဲ့သည့်နေရာများအပြင် တောတောင်၊ ကားလမ်း၊ လူနေခြံဝန်းများအထိ မိုင်းရှင်းလင်းရေး လုပ်ဆောင်နေရကြောင်း သိရသည်။
‎
‎

မောင်တောမြို့နယ်၊ သစ်တောရွာဝင်ဝကားလမ်းဘေးတွင် စစ်ကော်မရှင်ထောင်ထားခဲ့သည့် မြေမြှုပ်မိုင်း ၈၅လုံး၊ လေးမိုင်စခန်းဘေး ကားလမ်းမတွင် မြေမြှုပ်မိုင်း ၄၃ လုံးတို့ကို AAက ရှင်းလင်းခဲ့ကြောင်း သိရသည်။

AA သည် ‎မောင်တောမြို့ကို အလုံးစုံထိန်းချုပ်ပြီးနောက် မြို့နယ်အတွင်း ဒေသခံပြည်သူများ ပြန်လည် နေထိုင်ရာတွင် စစ်ကော်မရှင်ထောင်ထားသည့် မိုင်းများနင်းမိပြီး ကိုယ်လက်အင်္ဂါဆုံးရှုံးသူများနှင့် အသက်သေဆုံးသူများရှိခဲ့သည်။
‎
‎

စစ်ကော်မရှင်က ၎င်းတို့တပ်စွဲရာနေရာများအပြင် အရပ်သားနေအိမ်ခြံဝန်းအတွင်းအထိပါ မြေမြှုပ်မိုင်း များကို ထောင်ထားသည့်အတွက် အရပ်သားပြည်သူများထိခိုက်သေဆုံးမှုများခဲ့သည်။
‎
ပုံစာ-အာရက္ခတပ်တော် (AA ) မိုင်းရှင်းလင်းရေးအဖွဲ့များ မိုင်းရှင်းလင်းနေစဉ်။