ဧရာဝတီတိုင်းမ်
စက်တင်ဘာ ၄ ရက်
ကချင်ပြည်နယ်၊ ဗန်းမော်တိုက်ပွဲတွင် စစ်တပ်နှင့် KIAပူးပေါင်းတပ်တို့ တိုက်ပွဲဖြစ်နေရာ စစ်တပ်က ခံစစ်အနေအထားဖြင့် တိုက်နေရကြောင်း စစ်ရေးသတင်းရင်းမြစ်များထံက သိရသည်။
ယခုရက်ပိုင်းတွင် ဗန်းမော် စစ်မျက်နှာရှိ စစ်မြေပြင်ဆေးတပ်ရင်း မဆရ ၁၁ ဘက်အထိ ခံစစ်ဆင်တိုက်ခိုက်ခံနေရခြင်းဖြစ်သည်။
”တိုက်ပွဲက စစ်တပ်ဘက်က ခံစစ်ပြန်ဖြစ်ထားပြီ။ သိမ်းထားတဲ့ တပ်ရင်းတွေပြန်မပါအောင် အားထုတ်နေရတယ်ပြောပါတယ်” ဟု ကချင်သတင်းရင်းမြစ်က ဧရာဝတီတိုင်းမ်ကိုပြောသည်။
ခလရ ၂၃၆၊ အမတ ၃၆၆၊ တကရ ၅၀၁၄ နှင့် ဗန်းမော်လေဆိပ် တို့ကို ပြန်လည်ရယူထားသည့် စစ်ကော်မရှင်တပ်မှာ KIA ၏ ထိုးစစ်ဆင်နေမှုကို လေကြောင်းနှင့် ဒရုန်းအဓိကထား တုန့်ပြန်တိုက်ခိုက်နေကြောင်း သတင်းရင်းမြစ်များကဆိုသည်။
စစ်တပ်အနေဖြင့် ဗန်းမော်တွင် အဓိကတိုက်ခိုက်ရေး ခြေလျင်တပ်ရင်း ခလရ ၄၇ တစ်ရင်းသာရှိပြီး ကျန်တပ်ရင်း သုံးရင်းမှာ စစ်လက်ရုံးတပ်များသာဖြစ်ကာ ခံစစ်အနေအထားသို့ ပြောင်းလဲ သွားခြင်းဖြစ်သည်။
စစန ၆၄၁ (စစ်လက်နက်ပစ္စည်းတပ်စု) ၊ မဆရ ၁၁ (စစ်မြေပြင်ဆေးတပ်ရင်း)၊ ထပရ ၉၃၃ (ထောက်ပံ့နှင့် ပို့ဆောင်ရေးတပ်ခွဲ) တို့သာ ဗန်းမော်တွင် ကျန်ရှိသည်။
ဗန်းမော်ကို စစ်ကော်မရှင်က စစ်သင်္ဘောများဖြင့် လူအင်အားနှင့် လက်နက်ခဲယမ်းများ ဖြည့်တင်းပြီးနောက် တိုက်ပွဲများပြန်လည်ပြင်းထန်လာကာ လေကြောင်းပစ်ကူ ဒါဇင်ကျော်ကို နေ့စဉ်အသုံးပြုတိုက်ခိုက်ခဲ့နေကြောင်း သိရသည်။
ထို့အပြင် မြို့ပေါ်ရှိ အထပ်မြင့်ဟိုတယ်များတွင်ပါ စိုးမိုးမှုရယူရန်ကြိုးစားခဲ့ပြီးနောက် မြို့တွင်းတိုက်ပွဲပြင်းထန်ကာ စစ်ကော်မရှင်တပ်ဘက်က အစုလိုက် အပြုံလိုက်သေဆုံးမှုများ ဖြစ်ပေါ်ခဲ့သည်။
လက်ရှိတွင် စစ်ကော်မရှင်က ကချင်ပြည်နယ်အတွင်းရှိ ဗန်းမော်၊ ဖားကန့် ၊ ဝိုင်းမော်တို့တွင် စစ်ရေးဖော်ဆောင်နေပြီး လေကြောင်းနှင့် လက်နက်ကြီး ပစ်ကူကို အားပြုနေကြောင်း သိရသည်။
