ဧရာဝတီတိုင်းမ်
စက်တင်ဘာ ၃ ရက်
ကရင်ပြည်နယ်၊ တနင်္သာရီတိုင်းနှင့် ထိစပ်နေသော ထိုင်း-မြန်မာနယ်စပ်ရှိ စစ်ကော်မရှင် အထိုင်စခန်းများကို အမျိုးသားညီညွတ်ရေးအစိုးရ (NUG)၊ ကာကွယ်ရေးဝန်ကြီးဌာန၊ ပြည်သူ့ကာကွယ်ရေးတပ်မတော် (PDF)၊ အထူးတိုင်းစစ်ဌာနက တိုက်ခိုက်သိမ်းပိုက်ထားကြောင်း ယနေ့ စက်တင်ဘာ ၃ ရက်တွင် ထုတ်ပြန်လာသည်။
ထိုအထူးတိုင်းစစ်ဌာနကို ကရင်ပြည်နယ်နှင့် မွန်ပြည်နယ်တွင် အခြေပြု ဖွဲ့စည်းထားသော PDF နည်းဗျူဟာများ၊ တပ်ရင်း/တပ်ဖွဲ့များ၊ ဒရုန်းလက်ရုံးတပ်ဖွဲ့များ၊ ပြည်သူ့ကာကွယ်ရေးအဖွဲ့ (ပကဖ)များဖြင့် စုဖွဲ့ထားပြီး စစ်ကော်မရှင်၏ အဆိုပါတပ်စခန်းများအား ယခုနှစ်အတွင်း သိမ်းပိုက်နိုင်ခြင်းဖြစ်ကြောင်း သိရသည်။
ယင်းအပြင် ယခုနှစ် ဖေဖော်ဝါရီ ၁ ရက်တွင် မဲပလီဗျူဟာ စခန်းကုန်းနှင့် ပဲခူးတိုင်း ရွှေကျင်မြို့နယ်ရှိ ခမရ ၅၉၈ တပ်ရင်းဌာနချုပ်ကို တိုက်ခိုက်သိမ်းပိုက်နိုင်ပြီး လှဂွန်းပျိုစခန်းမှ တပ်ရင်းမှူးအပါ အခြားအဆင့် တပ်သား (၁၆) ဦးကိုလည်း လက်နက်များနှင့် အလင်းဝင်ရောက်အောင် စည်းရုံးနိုင်ခဲ့ကြောင်း အထူးတိုင်းစစ်ဌာနထံက သိရသည်။
ထို့အပြင် KNLA တပ်ဖွဲ့များနှင့်အတူ ထိုင်း-မြန်မာနယ်စပ် စခန်းသိမ်းတိုက်ပွဲများ၊ ဖာပွန်မြို့သိမ်းတိုက်ပွဲနှင့် အနန်းကွင်းဗျူဟာစခန်းသိမ်း တိုက်ပွဲများလည်း ဆက်လက်ဖော်ဆောင်လျက်ရှိကာ တပ်ပြောင်းရွှေ့မှု၊ စစ်ဆင်ရေးနှင့် နယ်မြေစိုးမိုးရေး လုပ်ငန်းများကြောင့် ယခုမှသာ ထုတ်ပြန်နိုင်ခြင်းဖြစ်ကြောင်း သိရသည်။
စစ်ရေးလှုပ်ရှားမှုများအနေဖြင့် KNU/KNLA တပ်များနှင့်အတူ ကရင်၊ မွန်နှင့် ရေး – ထားဝယ် ဒေသများအပြင် ပဲခူး၊ ရန်ကုန်တိုင်းစစ်ဌာနများနှင့်ပါ ပူးပေါင်း၍ ပဲခူးတိုင်းအတွင်းရှိ နယ်မြေတချို့တွင် စစ်ရေးဖော်ဆောင်ကာ နယ်မြေစိုးမိုးရေးလုပ်ငန်းများ ဆောင်ရွက်လျက်ရှိကြောင်း အထူးတိုင်းစစ်ဌာနက ဆိုသည်။
အလားတူ အထူးတိုင်းစစ်ဌာန စစ်ရေးလှုပ်ရှားနယ်မြေများအတွင်း စစ်ကော်မရှင်၏ ရွေးကောက်ပွဲကို လုံးဝပြုလုပ်ခွင့် မရနိုင်သလို ရွေးကောက်ပွဲအကြောင်းပြု၍ နယ်မြေချဲ့ထွင်သည့် ထိုးစစ်များကိုလည်း နယ်မြေလုံးဝ (လုံးဝ) မဆုံးရှုံးစေရေး၊ ပြည်သူလူထုလုံခြုံရေးနှင့် အကာအကွယ်ပေးရေး ဦးစားပေးသွားမည်ဖြစ်ကြောင်း သိရသည်။
ထို့အတူ PDF စစ်ရုံးချုပ်၏ မဟာဗျူဟာ စစ်ရေးရည်မှန်းချက်များ၊ EROs များ၏ စစ်ရေးရည်မှန်းချက်များအား အတူတကွလက်တွဲ ဖော်ဆောင်သွားမည်ဖြစ်ပြီး စစ်တောင်းမြစ်ဝှမ်းအခြေပြု၍ ပဲခူး၊ ရန်ကုန် စစ်ဆင်ရေးများကိုလည်း နီးစပ်ရာတိုင်းစစ်ဌာနများနှင့်အတူ လက်တွဲချိတ်ဆက် ဖော်ဆောင်သွားမည်ဖြစ်ကြောင်း သိရသည်။
ထို့ကြောင့် ပြည်သူလူထုဝန်ထုပ်ဝန်ပိုး မဖြစ်စေရန်နှင့် ထိခိုက်နစ်နာနိုင်သည့် ကိစ္စရပ်များအား အထူးသတိပြုရှောင်ရှားလျက် ပြည်သူလူထုသဘောဆန္ဒနှင့်အညီ စစ်အာဏာရှင်စနစ် အပြီးတိုင်ချုပ်ငြိမ်း၍ ဖက်ဒရယ်ဒီမိုကရေစီနိုင်ငံတော်သစ် ပေါ်ပေါက်သည်အထိ ခိုင်မာသောသန္ဓိဌာန်ဖြင့် ဆက်လက်တိုက်ပွဲဝင်သွားမည်ဟု အထူးတိုင်းစစ်ဌာနက ဖော်ပြထားသည်။
လက်ရှိတွင် အထူးတိုင်းစစ်ဌာနကို တောင်ပိုင်းရှိ PDF နည်းဗျူဟာ ၂၇၊ နည်းဗျူဟာ ၃၂၊ နည်းဗျူဟာ ၃၃၊ နည်းဗျူဟာ ၃၆၊ နည်းဗျူဟာ ၃၇၊ စုစုပေါင်း ဗျူဟာ ငါးခုဖြင့် စုဖွဲ့ထားပြီး တိုင်းစစ်ဌာနကွပ်ကဲမှုအောက်တွင် တပ်ရင်း (၁၁) ရင်းရှိမည်ဖြစ်သည်။
တပ်ရင်းများအနေဖြင့် အမှတ် ၇၈၀၁ တပ်ရင်း၊ အမှတ် ၇၈၀၂ တပ်ရင်း၊ အမှတ် ၇၈၀၄ တပ်ရင်း၊ အမှတ် ၇၈၀၅ တပ်ရင်း၊ ကော်ဘရာတပ်ရင်း(စစ်ကြောင်း ၁/၂)၊ ကျားသစ်နက်တပ်ရင်း၊ ဒေါနတပ်ရင်း (စစ်ကြောင်း ၁/၂/၃)၊ တောင်ညိုတပ်ရင်း၊ Southern Eagle တပ်ရင်း၊ နဂါးဖြူတပ်ရင်း၊ SOG တပ်ရင်းတို့ ပါဝင်ကြကြောင်း သိရသည်။
ထို့အပြင် တိုင်းစစ်ဌာန၏ စစ်ဆင်ရေးကွပ်ကဲမှုအောက်တွင် ဒရုန်းလက်ရုံးအထူးတပ်ဖွဲ့ လေးဖွဲ့ရှိပြီး1801 ဒရုန်းတပ်ရင်း၊ SDDF ဒရုန်းအထူးတပ်ဖွဲ့၊ ရောင်နီ ဒရုန်းအထူးတပ်ဖွဲ့နှင့် Cloud Wings ဒရုန်းအထူးတပ်ဖွဲ့ တို့ဖြစ်ကာ တပ်ရင်းအတည်ပြုကုတ် မကျသေးသည့် (စိစစ်ဆဲ) PDF တပ်ရင်း သုံးရင်းနှင့် ဒရုန်းတပ်ဖွဲ့ နှစ်ဖွဲ့လည်း ရှိနေသေးကြောင်း သိရသည်။
ပကဖများအနေဖြင့် မွန်ပကဖ၊ ရန်ကုန်ပကဖ၊ ပဲခူးခရိုင်ပကတို့လည်း တိုင်းစစ်ဌာန၏ စစ်ဆင်ရေးကွပ်ကဲမှုအောက်တွင် ပူးပေါင်းလျက်ရှိကာ PDF စစ်ရုံးချုပ်၏ လက်ရုံးအထူးတပ်ဖွဲ့ဖြစ်သော SOF သည် အမှတ် (၁) စစ်ဆင်ရေးမှူး၏ စစ်ဆင်ရေးကွပ်ကဲမှုနှင့်အတူ ကရင်၊ မွန်နှင့် ပဲခူးအတွင်း တပ်များဖြန့်ကျက်အထိုင်ချကာ အထူးတိုင်းစစ်ဌာနနှင့်အတူ စစ်ဆင်ရေးများ ပူးပေါင်းလျက်ရှိကြောင်း သိရသည်။
ယင်းအပြင် တိုင်းစစ်ဌာနအဖွဲ့ဝင်များအဖြစ် တိုင်းကွပ်ကဲရေးမှူး၊ ဒု-ကွပ်ကဲရေးမှူး၊ စစ်ဆင်ရေးအရာရှိ၊ စစ်ရေးအရာရှိ၊ စစ်ထောက်အရာရှိ၊ စစ်ထောက်လှမ်းရေးအရာရှိ၊ ပြည်သူ့လုံခြုံရေးအရာရှိ၊ ရုံးအဖွဲ့မှူး၊ နည်းဗျူဟာမှုး ငါးဦးဖြင့် စနစ်တကျ ဖွဲ့စည်းထားပြီး စစ်ဆင်ရေးနယ်မြေအတွင်း တပ်များနှင့်အနီးကပ်ဆုံး ကွပ်ကဲစီမံ အုပ်ချုပ်လျက်ရှိကြောင်း သတင်းထုတ်ပြန်ထားသည်။
ဓာတ်ပုံ-အထူးတိုင်းစစ်ဌာန
