ဧရာဝတီတိုင်း
စက်တင်ဘာ ၂ ရက်
မွန်ပြည်တော်လှန်ရေးတပ်(MSRF) တပ်ဖွဲ့၏ ၂၀၂၅ ခုနှစ်၊ စက်တင်ဘာ ၁ ရက်နေ့တွင် ကျရောက်သည့် သုံးနှစ်ပြည့် စစ်ဆင်ရေးကာလအတွင်း တိုက်ပွဲအကြိမ်ရေ (၆၉) ကြိမ်ဖော်ဆောင်နိုင်ခဲ့ပြီး စစ်ကော်မရှင် တပ်ဖွဲ့ဝင် ၃၆၉ ဦးအထိသေဆုံးခဲ့ပြီ ဖြစ်ကြောင်း MSRF ထံမှ သိရသည်။
MSRF သည် ယခု ၂၀၂၅ ခုနှစ်အတွင်း တိုက်ပွဲပေါင်း ၃၁ ပွဲအထိဖော်ဆောင်ထားနိုင်ခဲ့ပြီး စစ်ဆင်ရေးအတွင်း စစ်ကော်မရှင်တပ်ဖွဲ့ဝင် ၂၂၉ ဦးသေဆုံးကာ ၁၀၁ ဦးထက်မနည်း ထိခိုက် ဒဏ်ရာရရှိခြင်းများရှိကြောင်းလည်း သိရသည်။
“အခုနှစ်ကပြောရရင် အရင်နှစ်တွေနဲ့ တော်တော်လေးကွာခြားသွားတယ်ပေါ့နော်။ စစ်ကောင်စီဘက် ကနေ လူငယ်ကိုလူငယ်အချင်းချင်းသတ်တဲ့ စစ်မှုထမ်းဥပဒေကနေပြီးတော့ အင်အားကိုထပ်ဖြည့် လာနိုင်တယ်။ ၂၀၂၅ မှာနိုင်ငံရေးထွက်ပေါက်ရဖို့အတွက်ကို လိမ်ညာရွေးကောက်ပွဲကျင်းပပြုလုပ်ဖို့ သူတို့အားသွန်ခွန်စိုက်ပြင်ဆင်နေတာမျိုးရှိတယ်ပေါ့နော်။ ဒီအတွက်ကြောင့်စစ်ရေးအရမှာလည်း ပြင်းထန်လာတာမျိုးရှိတယ်။ ကျွန်မတို့ကြံ့ကြံ့ခံပြီးတော့ ဆက်လက်ပြီးတော့ တိုက်ပွဲဝင်နေရဆဲ ဖြစ်ပါတယ်” ဟု MSRF သတင်းနှင့်ပြန်ကြားရေးတာဝန်ရှိသူ မိတလညဏ် ကဧရာဝတီတိုင်းမ်ကို ပြောသည်။
မွန်တော်လှန်ရေးတပ်ဖွဲ့ MSRF သည် မွန်ပြည်နှင့် မွန်လူမျိုးအခြေပြုတပ်များအနက် နွေဦးတော်လှန်ရေး ကာလတွင် ပထမဆုံးသေနတ်ပစ်ဖောက် ခဲ့သည့်တပ်ဖွဲ့တစ်ခုဖြစ်ပြီး မွန်ပြည်နယ်တောင်ပိုင်း၊ ခေါဇာမြို့မှ စတင်တိုက်ခိုက်မှုများပြုလုပ်ခဲ့ပြီး လက်ရှိတွင် မဟာမိတ်တပ်များနှင့်အတူ သံဖြူဇရပ်-ရေး-ထားဝယ် လမ်းမကြီး ကို ထိန်းချုပ်စိုးမိုးထားနိုင်ပြီးဖြစ်ကြောင်း သိရသည်။
မွန်ပြည်တော်လှန်ရေးတပ်သည် ပြီးခဲ့သည့် ဩဂုတ် ၂၇ ရက်နေ့တွင်ပင် ပြည်သူ့ကာကွယ်ရေး တပ်မတော်၊ အမှတ်-၁ စစ်ဆင်ရေးနယ်မြေ နည်းဗျူဟာ(၃၃) နှင့် မဟာမိတ်ဆက်ဆံရေးမှ တဆင့်မြှင့်ကာ “ညီနောင်တပ်ဖွဲ့” အဖြစ် ဖွဲ့စည်းခဲ့ကြောင်း သိရသည်။
“တိုက်ပွဲပေါင်း ၆၉ ပွဲဖော်ဆောင် နိုင်တဲ့အထဲမှာ အဓိကအရေးကြီးဆုံး အခက်အခဲကတော့ လက်နက်ခဲယမ်းလိုအပ်ချက်ကြီးမားတဲ့ပြသနာဖြစ်တယ်။ ဒုတိယအနေနဲ့က လူသားအရင်းအမြစ် အခက်အခဲဖြစ်တယ်။ ကျွန်မတို့ မွန်လူငယ်တွေက တော်လှန်ရေးမှာ ထိုက်သင့်သလောက်ပါဝင်တယ် ဆိုကြပေမဲ့ တော်လှန်ရေးအရွေ့မှာ အားကောင်းကောင်းနဲ့တွန်းနိုင်ဖို့အတွက် အင်တိုက်အားတိုက် ပါဝင်တာမျိုးအားနည်းနေသေးတဲ့အတွက်ကြောင့် လူသားအရင်းမြစ်လိုအပ်ချက်အရ အခက်အခဲ တစ်ရပ် အဖြစ်ရှိနေပါသေးတယ်” ဟု မိတလညဏ်က ဆက်လက်ပြောကြားသည်။
လက်ရှိတွင် ပြည်သူ့ကာကွယ်ရေး(PDF) တပ်ဖွဲ့များနှင့်အတူ စစ်ရေးတင်းမာနေသည့် တနင်္သာရီတိုင်း၊ ရေဖြူဒေသတွင် တိုက်ပွဲဖော်ဆောင်လျက်ရှိပြီး MSRF တပ်ဖွဲ့သည် ရေးပြည်သူ့ကာကွယ်ရေးတပ် (YPDF) နှင့်အတူ မွန်ပြည်ဖက်ဒရယ်ကောင်စီ(MSFC) ကာကွယ်ရေးဌာနအောက်ရှိ လက်နက်ကိုင် တပ်ဖွဲ့များ ဖြစ်ကြောင်း သိရသည်။
MSRF နှင့် မဟာမိတ်တပ်ဖွဲ့များသည် စစ်ရေးတင်းမာနေသည့် ရေဖြူဒေသတွင် ပြီးခဲ့သည့် ဩဂုတ် ၁၉၊ ၂၀၊ ၂၂၊ ၂၃၊ ၂၄၊ ၂၅ ရက်ဆက်တိုက် တိုက်ပွဲများဖြစ်ပွားခဲ့ပြီး စစ်ကော်မရှင်တပ်ဖွဲ့ဝင် ၃၆ ဦးထက်မနည်းသေဆုံးကာ ခမရ-၄၀၉ တပ်ရင်းမှ ဗိုလ်မှူးတစ်ဦးအပါအဝင် အများအပြားထိ ခိုက်ဒဏ်ရာရရှိခဲ့ကြောင်း သိရသည်။
ဓာတ်ပုံ – MSRF
