ဧရာဝတီတိုင်းမ်
ဩဂုတ် ၃၁ ရက်
စစ်ကော်မရှင်လက်အောက်ခံ မြန်မာ့ပုံရိပ်ဖော်ညွှန်းရေးအဖွဲ့က ဦးဆောင်၍ အီတလီနိုင်ငံသား နိုင်ငံရေးအတွေးအခေါ်ရှင် Mr. Lorenzo Maria Pacini ရေးသားသော “Myanmar, in the Golden Land” အမည်ရှိ စာအုပ် ထွက်ရှိလာကြောင်း သိရသည်။
ယင်းစာအုပ်သည် စစ်ကော်မရှင်ကျင်းပမည့် ရွေးကောက်ပွဲကို နိုင်ငံတကာက ကြိုဆိုရန် ရည်ရွယ်ပြီး ဝါဒဖြန့်ချိ ရေး ရေးသားထားကြောင်း သိရသည်။
အဆိုပါစာအုပ်ကို ပြီးခဲ့သည့် ဩဂုတ် ၂၉ ရက်နေ့တွင် ရန်ကုန်၌ မိတ်ဆက်ပွဲ ပြုလုပ်ခဲ့ပြီး စစ်ကော်မရှင်ပြန်ကြားရေးဝန်ကြီး ဦးမောင်မောင်အုန်း၊ ရန်ကုန်တိုင်းဝန်ကြီးချုပ် ဦးစိုးသိန်း၊ မြန်မာ့ပုံရိပ်ဖော်ညွှန်းရေးအဖွဲ့ (Myanmar Narrative Think Tank) နှင့် စာအုပ်ထုတ်ဝေရေးအဖွဲ့ (Anteo Edizioni) တို့ တက်ရောက်ခဲ့ကြသည်။
စာအုပ်နှင့်ပတ်သက်၍ “စာအုပ်ထဲမှာ မြန်မာနိုင်ငံကို မှန်ကန်သင့်တော်တဲ့ ရှုမြင်ချက်တွေနဲ့ သမိုင်းအစကနေ ယနေ့အထိ နိုင်ငံရေးဖြစ်ပေါ်ပြောင်းလဲမှုတွေကို ရေးသားထားတာ တွေ့ရပါတယ်” ဟု စစ်ကော်မရှင်ဝန်ကြီး ဦးမောင်မောင်အုန်းက ပြောကြားခဲ့သည်။
ထို့အပြင် စစ်ကော်မရှင်ကို ထောက်ခံသူများက မြန်မာနိုင်ငံကို သီးခြားရှုထောင့်က တင်ပြထားပြီး ရွေးကောက်ပွဲကို လက်ခံရန် နိုင်ငံတကာကို ထောက်ပြထားကြောင်း ဆိုထားသည်။
စစ်ကော်မရှင်၏ ဝါဒဖြန့်လုပ်ငန်းများကို ဆောင်ရွက်ရန်အတွက် စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်၏ စီစဉ်မှုဖြင့် ပြန်ကြားရေးဝန်ကြီးဌာနက “မြန်မာ့ပုံရိပ်ဖော်ညွှန်းရေးအဖွဲ့” နှင့် “တိုးတက်ခိုင်မာအားကောင်းသည့် လူမှုအသိုက်အဝန်းဖော်ဆောင်ရေးလုပ်ငန်းကော်မတီ” တို့ကို ဖွဲ့စည်းခဲ့သည်။
“တိုးတက်ခိုင်မာအားကောင်းသည့် လူမှုအသိုက်အဝန်းဖော်ဆောင်ရေးလုပ်ငန်းကော်မတီ” ကို စစ်ကော်မရှင်သမ္မတရုံးဝန်ကြီး ဦးကိုကိုလှိုင် က ဥက္ကဋ္ဌအဖြစ် ဦးဆောင်ပြီး၊ ဒုဥက္ကဋ္ဌအဖြစ် ပြန်ကြားရေးဝန်ကြီး ဦးမောင်မောင်အုန်း က တာဝန်ယူသည်။
အဆိုပါကော်မတီသည် ပြည်သူ့စစ်မှုထမ်းဥပဒေအပါအဝင် စစ်ကော်မရှင်၏ မူဝါဒများကို ပြည်သူများလက်ခံလာအောင် စည်းရုံးရန်နှင့် တော်လှန်ရေးအဖွဲ့များ၏ သတင်းဖော်ပြချက်များကို တန်ပြန်ရန် ရည်ရွယ်ဖွဲ့စည်းထားကြောင်း သိရသည်။
“မြန်မာ့ပုံရိပ်ဖော်ညွှန်းရေးအဖွဲ့” ၏ ဥက္ကဋ္ဌမှာ ဦးကိုကို (စက်မှုတက္ကသိုလ်) ဖြစ်ပြီး အဖွဲ့ဝင်များအဖြစ် ဒေါက်တာဇော်ဦး၊ ဦးကျော်လင်းဦး၊ ဒေါက်တာနိုင်ဆွေဦး နှင့် ဒေါက်တာခင်မောင်လွင် တို့ ပါဝင်ပြီး သုတေသနအဖွဲ့အမည်ခံကာ စစ်ကော်မရှင်ကို ထောက်ခံသည့် သတင်းအကြောင်းအရာများဖန်တီး၍ ပြည်သူနှင့် နိုင်ငံတကာကို ဝါဒဖြန့်ချိရန် လုပ်ဆောင်လျက်ရှိကြောင်း သိရသည်။
ဓာတ်ပုံ – MOI
