ဧရာဝတီတိုင်းမ်
ဩဂုတ် ၃၁ ရက်
ကျောက်မဲမြို့နယ်၊ နောင်ပိန်ကျေးရွာကို စစ်ကော်မရှင်က အင်အားအလုံး အရင်းသုံး ထိုးစစ်ဆင်ပြီး ဝင်ရောက်ထိန်းချုပ်လိုက်ကြောင်း သိရသည်။
စစ်ကော်မရှင်က ပြီးခဲ့သည့် ဩဂုတ် ၁၉ ရက်နေ့တွင် နောင်ပိန်ကျေးရွာမှ ၂ မိုင်ခန့်ကွာဝေးသည့် ထန်းတစ်ပင်ကျေးရွာကို ဝင်ရောက်ခဲ့ပြီး နောင်ပိန်ကျေးရွာကို လေကြောင်းပစ်ကူ လက်နက်ကြီးပစ်ကူများဖြင့် ဝင်ရောက်တိုက်ခိုက်ခဲ့ခြင်းဖြစ်သည်။
စစ်ကော်မရှင်က အင်အားအလုံးအရင်းနှင့် လက်နက်ကြီး၊ လေကြောင်း သာလွန်အင်အားသုံး၍ ပြီးခဲ့သည့် ဩဂုတ် ၂၉ ရက်နေ့တွင် နောင်ပိန်ကိုဝင်ရောက်ထိန်း ချုပ်လိုက်ကြောင်း သိရသည်။
“စစ်တပ်ဘက်ကလည်း အတော်သေတယ်။ အသေခံပြီးကို ထိုးလာတာ”ဟု စစ်ရေးသတင်းရင်းမြစ်က ဧရာဝတီတိုင်းမ်ကို ပြောသည်။
စစ်ကော်မရှင်က နောင်ပိန်ကျေးရွာကို ဩဂုတ် ၁၉ ရက်မှ ၂၉ ရက်အထိ ရက်ပေါင်း ၁၀ ရက်ကျော်ကြာ ထိုးစစ်ဆင်ခဲ့ပြီး တိုက်ပွဲကြီးငယ် ၄၇ ကြိမ်ဖြစ်ပွားခဲ့ကာ ရွာများနှင့်နေရာအချို့ကိုပါ သိမ်းပိုက်နိုင်ခဲ့ကြောင်း သိရသည်။
ထို့အပြင် နောင်ချို-ကျောက်မဲမြို့ကြားရှိ ခဲတုံကြိုင်၊ ကောင်းပို၊ ထန်းတပင်၊ ပန်တိ၊ နောင်ပိန်၊ ပင်ပေါ၊ ဇီးပင်၊ ကျောင်းကုန်းကျေးရွာများနှင့် စန္ဒမုနိကျောင်း တိုက်၊ နောင်ပစ်လမ်းခွဲအပါအဝင် ဂုတ်တွင်းနှင့် ဂုတ်ထိပ်တစ်ဝိုက်ကို စစ်ကော်မရှင်က ပြန်လည်သိမ်းယူနိုင်ခဲ့ကြောင်း ထုတ်ပြန်ထားသည်။
စစ်ကော်မရှင်က ပျက်စီးသွားသည့်ဂုတ်ထိပ်တံတားကို ထောက်ပို့လမ်း ကြောင်းအတွက် အသုံးပြုရန် ပြီးခဲ့သည့် ဩဂုတ် ၂၉ ရက်နေ့ကတည်းက ပြန်လည်ပြင်ဆင်မှုများ လုပ်ဆောင်နေကြောင်း သိရသည်။
စစ်ကော်မရှင်သည် ဂုတ်တွင်းချောင်းကိုဖြတ်ပြီး ကျောက်မဲရှိ နောင်ပိန်ကျေးရွာမှတစ်ဆင့် နောင်ပိန်မြို့အနီးထိကပ်ကာ ကျောက်မဲကို ဝင်ရောက်ရန် အင်အားသုံး ထိုးစစ်ဆင်လာခြင်းဖြစ်သည်။
မန္တလေး-မူဆယ်လမ်းပိုင်းတွင် စစ်ကော်မရှင်က နောင်ချိုကို ရပြီးနောက် နောင်ချို-ကျောက်မဲလမ်းပိုင်းကိုပါ စစ်ကြောင်းဝင်ရောက်သွားလာနိုင်ရန် မြေပြင်ထိုးစစ်ဆင်နေခြင်းဖြစ်သည်။
