စစ်ကောင်စီက မြန်မာနိုင်ငံကူးလက်မှတ်စာအုပ်ဖိုးကို ကျပ် ၅၀၀၀ တိုးမြှင့်၍ ၄၀၀၀၀ ကျပ် သတ်မှတ်

ဧရာဝတီတိုင်းမ်
ဩဂုတ် ၃၀ ရက်

စစ်ကောင်စီက မြန်မာနိုင်ငံကူးစာအုပ်ဖိုးကို ကျပ် ၅၀၀၀ ဈေးတက်လိုက်ပြီး စာအုပ်ဖိုး ကျပ်လေးသောင်း(၄၀,၀၀၀)အဖြစ် လာမည့်စက်တင်တာ ၁ ရက်နေ့မှစတင်ကာ ပြောင်းလဲ ကောက်ခံမည် ဖြစ်ကြောင်း စစ်ကောင်စီ သတင်းစာများတွင်ဖော်ပြထားသည်။

မြန်မာနိုင်ငံကူးလက်မှတ်လျောက်ထားရာတွင် ယခင်က စာအုပ်ဖိုးငွေ ၃၅၀၀၀ ကျပ်မှ ၄၀၀၀၀ သို့ ပြောင်းလဲသတ်မှတ် လိုက်ခြင်းဖြစ်ပြီး မြန်မာနိုင်ငံကူးလက်မှတ်ပျောက်ဆုံးခြင်းနှင့် ရေစို၊ စွန်းထင်း ပျက်စီးသူများ ပြန်လည်လျှောက် ထားရာတွင် ဒဏ်ကြေးငွေ ကျပ် ၅၆၀၀၀ နှင့် စာအုပ်ဖိုးပေါင်းကာ ၉၆၀၀၀ ကျပ်ပေးဆောင်ရမည်ဖြစ်သည်။

နိုင်ငံကူးလက်မှတ်လျှောက်ထားရာ၌ မြို့ကြီးများတွင်Online Booking စနစ်ဖြင့် QR ကုတ်ရယူခြင်းဖြစ်ပြီး ကျန်ရုံးများတွင် လူကိုယ်တိုင်တန်းစီစနစ်ဖြင့်ပေးနေကြောင်း မြန်မာနိုင်ငံကူး လက်မှတ်ထုတ်ပေးရေးအဖွဲ့ထံက သိရသည်။

“အခုက Passport လုပ်ရင် UID နံပါတ်မပါရင်မရတော့ဘူး။ မှတ်ပုံတင်နဲ့ UID နံပတ်မှာ အချက် အလက်မှားနေတာ ပြင်ဖို့က နယ်ပြန်ရမှာမို့လို့ မပြင်ရသေးဘူး။ အဲဒါကို passport လုပ်မပေးဘူး။ မှတ်ပုံတင်နဲ့ကျန်တဲ့ အချက်အလက်တွေမှန်တယ်။ လဝကရုံးက စာရင်းသွင်းတာ မှားတာကို Passport လုပ်မရသေးဘူး”ဟု ရခိုင်မှ ရန်ကုန်မြို့သို့ပြောင်းရွှေ့လာသူ တစ်ဦးက ဧရာ၀တီတိုင်းမ်ကို ပြောသည်။

ထို့ပြင် တိုက်ပွဲများပြင်းထန်နေသော မြို့များအပါအဝင် တော်လှန်ရေးတပ်ဖွဲ့များ သိမ်းထားသည့် မြို့များသို့ ပြန်လည်၍ နိုင်ငံသားစိစစ်ရေးကတ် ( မှတ်ပုံတင် ) ပြင်ဆင်ရန်မှာ မဖြစ်နိုင်သောကြောင့် ရောက်ရှိရာ‌ဒေသရုံးတွင်သာပြင်ပေးသင့်ကြောင်း ၎င်းက ဆက်လက်ပြောကြားသည်။

စစ်ကောင်စီသည် နိုင်ငံကူးလက်မှတ်လုပ်ရာတွင် အခက်အခဲများဖြစ်စေရန်ပြုလုပ်ထားပြီး နိုင်ငံကူး လက်မှတ် ရှိပြီသူများ နိုင်ငံခြားထွက်ခွာရာတွင်လည်း ကန့်သတ်မှုပေါင်းစွာဖြင့် တင်းကျပ်ထားသည်။

လက်ရှိနိုင်ငံခြားထွက်မည့်သူများသည် အလုပ်လုပ်မည်ဆိုပါက PJ အမျိုးအစားအပြင် OWIC (ပြည်ပအလုပ်သမားသက် သေခံကတ်ပြား) ကတ်ပါရမည်ဖြစ်ပြီး အလည်အပတ်သွားသူ PV အမျိုးအစားအတွက် မြန်မာပြည်အပြန် လေယာဉ်လက်မှတ်ကအစ သက်သေခံအချက်အလက်များ ပြသရကြောင်းသိရသည်။

နိုင်ငံကူးလက်မှတ်ရယူရန်အတွက် ရက်ချိန်းယူရာ၌ ရန်ကုန်ရုံးနှင့် မန္တလေးရုံးတွင်၂၀၂၅ ဇန်နဝါရီ အထိရောက်ရှိနေပြီး နေပြည်တော်ရုံးတွင် ၂၀၂၄ နိုဝင်ဘာအထိ ရောက်ရှိနေပြီဖြစ်သည်။

တော်လှန်ရေးတပ်ဖွဲ့များသိမ်းထားသော နိုင်ငံကူးလက်မှတ်ထုတ်ပေးရေးရုံး လားရှိုးရုံးခွဲမှနေ၍ နိုင်ငံကူး လက်မှတ်လျှောက်ထားသူများအနေဖြင့် ရန်ကုန်ရုံးနှင့် တောင်ကြီးရုံးတွင်ဆောင်ရွက်နိုင်ပြီး မြစ်ကြီးနား ရုံးခွဲမှသူများအတွက် မန္တလေးရုံးတွင်စာအုပ်လုပ်နိုင်ကြောင်းသိရသည်။

နိုင်ငံကူးလက်မှတ်စာအုပ် ထုတ်ယူရာတွင် ပြီးခဲ့သည့် ဧပြီလမှစတင်ကာ နိုင်ငံသား ဟုတ်/ မဟုတ် စိစစ်နိုင်ရန်အတွက် စစ်ကောင်စီ၏ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနမှ စိစစ် ထုတ်ပေးထားသော UID နံပါတ်ပါမှသာ ထုတ်ယူနိုင်မည်ဖြစ်ကြောင်း ထုတ်ပြန်ထားသည်။

ထို့ပြင် နိုင်ငံကူးလက်မှတ်လုပ်ရာနှင့်ပတ်သက်၍ ငွေကြေးအဆမတန်တောင်းခံသူများ၊ ကြားခံ ပွဲစားများအား ဖော်ထုတ်အရေးယူသွားမည်ဖြစ်ကြောင်း မြန်မာနိုင်ငံကူးလက်မှတ်ထုတ်ပေးရေးရုံးက ဆိုထားသည်။

ဓာတ်ပုံ – MOI
#passportစာအုပ် #ဈေးတက် #၄၀၀၀၀ကျပ်သတ်မှတ် #PV #PJ #Ayeyarwaddy_Times