ကန်ကြီးထောင့်မြို့နယ်တွင် ဆေးဝါးနှင့် ဆက်စပ်ပစ္စည်းတင်သည့် ကုန်တင်ယာဉ်များကို စစ်ဆေး၍ငွေတောင်း

ဧရာဝတီတိုင်းမ်
ဇန်နဝါရီ ၂၉ ရက်

ဧရာဝတီတိုင်း၊ ကန်ကြီးထောင့်မြို့နယ်တွင် ယမန်နေ့ ဇန်နဝါရီလ၂၈ရက်နေ့ကစ၍ မြို့တွင်းသို့ ဆေးဝါးနှင့် ဆက်စပ်ပစ္စည်းများအပါအဝင် အစားအသောက်၊အဝတ်အထည်များတင်ဆောင်သည့် ကုန်တင်ယာဉ်များကို စစ်ကောင်စီတပ်မှ တားဆီးစစ်ဆေးပြီး ငွေပေးမှသာ မြို့တွင်းသို့ ဝင်ခွင့်ပြုနေကြောင်း ကုန်တင်ယာဉ်မောင်းများထံကသိရသည်။

ကန်ကြီးထောင်မြို့နယ်ရှိ အပင်နှစ်ဆယ်မြို့အဝင်အထွက်စစ်ဆေးရေးဂိတ်တွင် မြို့တွင်းသို့ဝင်ရောက်မည့် ကုန်တင်ယာဉ်များကို လုံခြုံရေးအကြောင်းပြကာ ရှာဖွေစစ်ဆေးမှုများပြုလုပ်နေ‌ကြောင်း ကုန်တင်ယာဉ်မောင်းများထံကသိရသည်။

“ဆေးဝါးတွေနဲ့ကျန်းမာရေးပက်သက်တဲ့ပစ္စည်း‌တွေသယ်တဲ့ကားဆိုပိုအစစ်ခံရတယ်။ မုန့်တွေအဝတ်အထည်တွေကအဲ့လောက်မဟုတ်ဘူး။ မှောင်ခိုပစ္စည်းတွေပါမပါစစ်တယ်လို့ပြောတာပဲ။အရင်တုန်းကအဲ့လိုတခါမှအစစ်မခံရဘူး”ဟု မြို့တွင်းသို့ ဆေးဝါးနှင့်ဆက်စပ်ပစ္စည်းများ ပို့ဆောင်နေသည့် ရန်ကုန်မြို့ခံကုန်တင်ယာဉ်မောင်းတစ်ဦးက ဧရာဝတီတိုင်းမ်ကိုပြောသည်။

ထို့အပြင် ဆေးဝါးနှင့်ဆက်စပ်ပစ္စည်းများ၊ အဝတ်အထည်များကို မြို့တွင်းသို့ပို့ဆောင်နိုင်ရန်အတွက် ကုန်တင်ယာဉ်တစ်စီးလျှင် ငွေ ၅၀၀၀၀ ကျပ်မှ ၈၀၀၀၀ ကျပ်အထိ စစ်ကောင်စီတပ်သားများကို ပေးနေရကြောင်း ကုန်တင်ယာဉ်မောင်းများထံက သိရသည်။

“ ထိုင်းကနေမှောင်ခိုလာမှာစိုးလို့ စစ်တာတဲ့။ လိုင်စင်ရှိတယ်ဆိုလည်းမရဘူး။ အထောက်အထား ပြလည်း မြို့ထဲသယ်ခွင့်မပေးဘူး။ငွေ ငါးသောင်းပေးမှပဲလွှတ်ပေးလိုက်တယ်။ အခြားကားတွေကတော့ဘယ်လောက်ပေးရလဲမပြောတတ်ဘူး”ဟုထိုင်းအဝတ်အထည်နှင့်အစားအသောက်ကုန်ပစ္စည်းသယ်ဆောင်ပေးနေသည့် ကုန်တင်ယာဉ်မောင်းတစ်ဦးက ဆိုသည်။

အလားတူကန်ကြီးထောင့်မြို့နယ်တွင် ပြီးခဲ့သည့်နှစ် ဒီဇင်ဘာလအတွင်းကလည်း မြို့တွင်းသို့ဝင်ရောက်နေသည့် ဆန်ကုန်တင်ယာဉ်များကို အပင်နှစ်ဆယ်စစ်ဆေးရေးဂိတ်ရှိ စစ်ကောင်စီတပ်မှ လုံခြုံရေးအကြောင်းပြ ရှာဖွေစစ်ဆေးမှုပြုလုပ်ခဲ့ပြီး ငွေကျပ်သောင်းချီပေးမှသာပြန်လွှတ်ပေးခဲ့သည်။

#ကန်ကြီးထောင့်မြို့နယ် #ဆေးဝါးနှင့်ဆက်စပ် #ပစ္စည်း #ကုန်တင်ယာဉ် #Ayeyarwaddy_Times