ဧရာဝတီတိုင်းမ်
ဇူလိုင် ၂၄ရက်
ရခိုင်ပြည်နယ်၊ သံတွဲမြို့နယ်အတွင်းရှိ ရပ်ကွက်နှင့် ကျေးရွာများကို ရွေးတုအစိုးရ စစ်တပ်က လေကြောင်းမှ နေ့ရောညပါ အဆက်မပြတ် ဗုံးကြဲတိုက်ခိုက်လျက်ရှိကြောင်း ဒေသခံသတင်းရင်းမြစ် များနှင့် အာရက္ခတပ်တော် (AA)၏ ထုတ်ပြန်ချက်အရ သိရသည်။
စစ်တပ်သည် ယနေ့ ဇူလိုင် ၂၄ ရက်နေ့ နေ့လယ်ပိုင်းတွင်လည်း သံတွဲမြို့၊ ဒိုးေတာင်ရပ်ကွက်ကို ဂျက်ဖိုက်တာများဖြင့် လာရောက်တိုက်ခိုက်ခဲ့ပြီးနောက် (၁၂) နှစ်အရွယ် ကလေးငယ်တစ်ဦး ပွဲချင်းပြီး သေဆုံးခဲ့ကြောင်း ဒေသခံသတင်းရင်းမြစ်များထံမှ သိရသည်။
”အခု ညနေ ၃နာရီကျော်ကလည်း သံတွဲကို ဗုံးလာကြဲပြန်ပါတယ်။ မနေ့ကဆို ညကြီးအထိ လာကြဲနေ တာ” ဟု သတင်းရင်းမြစ်က ဧရာဝတီတိုင်းမ်ကိုပြောသည်။
စစ်တပ်သည် ယမန်နေ့ ဇူလိုင် ၂၃ ရက်နေ့တွင် သံတွဲမြို့နယ်၊ ငပလီမြို့ရှိ ဂျိတ္တောနှင့် လင်းသာ ကမ်းခြေအနီးရှိ အရပ်သားများနေထိုင်ရာ နေရာ နှစ် ခုကို ဂျက်ဖိုက်တာများဖြင့် ဗုံးကြဲတိုက်ခိုက် ခဲ့ကြောင်း AA က ထုတ်ပြန် သည်။
ထိုနေ့ မွန်းတည့် ၁၂ နာရီခန့်တွင် ဂျိတ္တော (၅) ရပ်ကွက်ရှိ ပုလဲရတနာဘုန်းကြီးကျောင်းနှင့် အနီး ပတ်ဝန်းကျင်ကို ဗုံးကြဲခဲ့သဖြင့် ဘုန်းကြီးကျောင်းနှင့် နေအိမ် ရှစ်လုံး ပျက်စီးခဲ့သည်။
အဆိုပါတိုက်ခိုက်မှုကြောင့် သံဃာတော်တစ်ပါးနှင့် ၁နှစ်ခွဲအရွယ် ကလေးငယ်တစ်ဦး အပါအဝင် အပြစ်မဲ့ပြည်သူ ခြောက်ဦး ထိခိုက်ဒဏ်ရာရရှိခဲ့ကြောင်း AA က အတည်ပြုသည်။ ထို့အပြင် ထိုနေ့ မွန်းလွဲ ၁ နာရီ ၃၀မိနစ် ခန့်တွင်လည်း လင်းသာကမ်းခြေရှိ AZ Family Resort ကို ဂျက်ဖိုက်တာက ဗုံး နှစ် လုံး ကြဲချခဲ့ရာ ဘန်ဂလိုအချို့နှင့် ပြည်သူ့နေအိမ်များ ပျက်စီးပြီး အရပ်သားတစ်ဦး ဒဏ်ရာရရှိခဲ့သည်။
စစ်တပ်သည် သံတွဲမြို့ကို ပစ်မှတ်ထား၍ ဇူလိုင် ၁၉ ရက်၊ ၂၃ ရက်နှင့် ၂၄ ရက်နေ့များတွင် နေ့ရောညပါ လေ ကြောင်းမှ ဗုံးကြဲတိုက်ခိုက်မှုများကို ပြုလုပ်လျက်ရှိရာ အရပ်သားထိခိုက်သေဆုံးမှုနှင့် အိုးအိမ် ပျက်စီးမှုများ ဆက်လက်တိုးပွားလျက်ရှိသည်။
ဓာတ်ပုံ-AA Info Desk
