ဧရာဝတီတိုင်းမ်
ဇွန်လ၂၅ ရက်
နေပြည်တော် အချုပ်ထောင်တွင် ထောင်သွင်းအကျဉ်းချခံထားရသော နိုင်ငံတော် အတိုင်ပင်ခံ ဒေါ်အောင်ဆန်းစုကြည်ကို အားပေးသောအနေဖြင့် အကျဉ်းထောင်အတွင်းရှိ ထောင်သားများ အားလုံးက “ခွန်အားဖြည့်မိငယ်” သီချင်းကို သံပြိုင်သီဆိုခဲ့ကြောင်း အကျဉ်းထောင်နှင့် နီးစပ်သူတဦးထံမှ သိရသည်။
ဇွန် ၂၄ ရက်နေ့ အကျဉ်းထောင်ပိတ်ချိန် ည ၇ နာရီတွင် အဆိုပါသီချင်းကို ထောင်သားများအားလုံးက သံပြိုင်သီဆိုခဲ့ကြပြီး အာဏာသိမ်း စစ်ကောင်စီ၏ အမှုပေါင်းများစွာဖြင့် ထောင်ချ၊ တရားစွဲခံထားရသော ဒေါ်အောင်ဆန်းစုကြည် ကြားသိကာ အားပေးခြင်း ဖြစ်ကြောင်း ၎င်းက ဆိုသည်။
ထိုကိစ္စနှင့် ပက်သက်ပြီး အကျဉ်းဦးစီးဌာနမှ မည်ကဲ့သို့ အရေးယူခြင်းမျိုး ပြုလုပ်မည်ဆိုသည်ကို တိတိကျကျ မသိရသေးသော်လည်း အကျဉ်းဦးစီးဌာနဘက်မှလည်း ဧရာဝတီတိုင်းမ်၏ ဆက်သွယ်မှုကို ပြန်လည်ဖြေကြားခြင်း မရှိပေ။
ဒေါ်အောင်ဆန်းစုကြည်ကို ထောင်ဒဏ်ချမှတ်ထားသည့် အမှုများ ဖြစ်ပြီးသည့်အတွက် အကျဉ်းသားတဦးကဲ့သို့ ထောင်ဒဏ်ကို ကျခံရမည့် သဘောသက်ရောက်ကြောင်း အာဏာသိမ်းစစ်တပ်၏ ပြောရေးဆိုခွင့်ရှိသူ ဗိုလ်ချုပ် ဇော်မင်းထွန်းက သတင်းမီဒီယာများကို ဖြေကြားထားသည်။
ဇွန်လ ၂၂ ရက်နေ့တွင် ဒေါ်အောင်ဆန်းစုကြည်ကို နေပြည်တော် အချုပ်ထောင်သို့ တဦးတည်းပို့ဆောင်ခဲ့ပြီး အချုပ်ထောင်အတွင်းရှိ သီးသန့်အဆောက်အဦတွင် ထားရှိကာ အကျဉ်းဦးစီးဌာန ဝန်ထမ်း ၃ ဦးကိုလည်း အတူနေထိုင်ရန် ခန့်အပ်ထားသည်။
